കേന്ദ്ര സർവ്വേയിൽ പോലും കേരളം ഒന്നാമത്, യുപിയിൽ ഏറ്റവും പിന്നിൽ; യെച്ചൂരി

കേരളത്തെ അവഹേളിച്ച യോഗി ആദിത്യനാഥിനെതിരെ സിപിഐഎം ജനറൽ സെക്രട്ടറി സീതാറാം യെച്ചൂരി. കേന്ദ്ര സർക്കാർ സർവ്വേയായ നിതി അയോഗിൽ പോലും കേരളമാണ് ഒന്നാമത്. രാജ്യത്തെ ഏറ്റവും മികച്ച സംസ്ഥാനം കേരളമാണെന്ന് മറ്റ് സർവ്വേകളും പറയുന്നു. നിതി ആയോഗ് പ്രകാരം ഉത്തർപ്രദേശ് രാജ്യത്ത് ഏറ്റവും പിറകിലാണ്. ഉത്തർപ്രദേശിനെ കേരളത്തെ പോലെ ആക്കണമെങ്കിൽ ബിജെപിയെ പരാജയപ്പെടുത്തണമെന്നും അദ്ദേഹം പറഞ്ഞു.

നേരത്തെ യോഗി ആദിത്യനാഥിന് മുഖ്യമന്ത്രി പിണറായി വിജയനും മറുപടി നൽകിയിരുന്നു. യോഗി ഭയക്കും പോലെ യുപി കേരളമായാൽ മതത്തിന്റെ പേരിൽ മനുഷ്യർ കൊല്ലപ്പെടില്ല. യുപിയിലെ വിദ്യാർത്ഥികൾക്ക് മികച്ച വിദ്യാഭ്യാസം ലഭിക്കും, ആരോഗ്യ മേഖലയുടെ നിലവാരം ഉയരും. സാമൂഹ്യ ക്ഷേമം ജീവിത നിലവാരം മെച്ചപ്പെടും. പ്രധാനമായി യോജിപ്പുള്ള സമൂഹം ഉണ്ടാകുമെന്നും മുഖ്യമന്ത്രി പറഞ്ഞു.

ഉത്തര്‍പ്രദേശിനോട് കേരളത്തെ പോലെയാകാന്‍ ആവശ്യപ്പെട്ട് പ്രതിപക്ഷ നേതാവ് വി.ഡി സതീശനും രംഗത്തെത്തി. യുപി ജനത ബഹുസ്വരത, ഐക്യം, വികസനം എന്നിവ തെരഞ്ഞെടുക്കണം. കേരളീയരും ബംഗാളികളും കശ്മീരികളും അഭിമാനിക്കുന്ന ഇന്ത്യക്കാരാണെന്നും അദ്ദേഹം ട്വീറ്റ് ചെയ്തു.

Story Highlights: sitaram-yechury-on-yogi