നിയമത്തിൻ്റെ വാളോങ്ങി പ്രതിഷേധാഗ്നി കെടുത്താമെന്ന് കരുതേണ്ട; കെ സുധാകരന്‍

കെ-റെയിൽ വിരുദ്ധ സമരത്തെ വർഗീയവത്കരിച്ച് അടിച്ചമര്‍ത്താനുള്ള ശ്രമം വിലപോകില്ലെന്ന് കെപിസിസി പ്രസിഡന്റ് കെ സുധാകരന്‍ എംപി. സര്‍ക്കാര്‍ അധിനിവേശത്തിനെതിരായ പ്രതിഷേധം കടുപ്പിക്കും. ഹീനതന്ത്രങ്ങൾ പയറ്റി സമരം അവസാനിപ്പിക്കാനാണ് സർക്കാർ ശ്രമിക്കുന്നതെന്നും അദ്ദേഹം ആരോപിച്ചു.

കുട്ടികളെയും സ്ത്രീകളെയും കൈകാര്യം ചെയ്യാന്‍ പൊലീസിന് മുഖ്യമന്ത്രി മൗനാനുവാദം നല്‍കി. മുഖ്യമന്ത്രി അനാവശ്യ ധാര്‍ഷ്ട്യവും പിടിവാശിയും ഉപേക്ഷിക്കണം. സാധാരണ ജനങ്ങളെ ജയിലിലടക്കാനാണ് സര്‍ക്കാര്‍ തീരുമാനമെങ്കില്‍ കോണ്‍ഗ്രസ് ശക്തമായി പ്രതിരോധിക്കും. നിയമത്തിന്റെ വാളോങ്ങി ജനകീയ പ്രതിഷേധാഗ്നി കെടുത്താമെന്ന മൂഢസ്വര്‍ഗത്തിലാണ് മുഖ്യമന്ത്രിയെന്നും സുധാകരന്‍ പരിഹസിച്ചു.

സര്‍ക്കാരും കെ-റെയില്‍ എംഡിയും പരസ്പരവിരുദ്ധമായ കാര്യങ്ങളാണ് പറയുന്നത്. തുടക്കം മുതല്‍ പച്ചക്കള്ളം പ്രചരിപ്പിച്ച് ഏത് വിധേനയും പദ്ധതി നടപ്പാക്കാനാണ് സര്‍ക്കാര്‍ ശ്രമം. അതിന് ഒടുവിലത്തെ ഉദാഹരമാണ് മന്ത്രിയുടെ വാക്കുകള്‍. ജനങ്ങളുടെ ആശങ്കപരിഹരിക്കാതെ ആര്‍ക്കുവേണ്ടിയാണ് ഈ പദ്ധതി നടപ്പാക്കുമെന്ന് മുഖ്യമന്ത്രി കാര്‍ക്കശ്യം പിടിക്കുന്നതെന്നും സുധാകരന്‍ ചോദിച്ചു.

Story Highlights: k sudhakaran against pinarayi vijayan