Advertisement

ട്വന്റി ട്വന്റി – ആം ആദ്മി വോട്ടുകള്‍ക്ക് എന്തു സംഭവിച്ചു; പെട്ടിയിലാക്കിയത് യുഡിഎഫോ?…

June 3, 2022
1 minute Read
വാർത്തകൾ നോട്ടിഫിക്കേഷൻ ആയി ലഭിക്കാൻ ഇവിടെ ക്ലിക്ക് ചെയ്യുക

ഉപതെരഞ്ഞെടുപ്പില്‍ തൃക്കാക്കരയുടെ തന്നെ ചരിത്രത്തിലെ ഏറ്റവും ഉയര്‍ന്ന ഭൂരിപക്ഷത്തോടെ ഉമ തോമസ് ജയിച്ചു കയറിയപ്പോഴും ഉയരുന്ന പ്രധാന ചോദ്യങ്ങളിലൊന്ന് ട്വന്റി ട്വന്റി – ആം ആദ്മി വോട്ടുകള്‍ക്ക് എന്തു സംഭവിച്ചു എന്നതാണ്. 2021-ലെ തെരഞ്ഞെടുപ്പില്‍ 13897 വോട്ടുകളാണ് ട്വന്റി 20 നേടിയത്. ആം ആദ്മിയ്ക്കും മണ്ഡലത്തില്‍ കുറഞ്ഞത് 10000ത്തോളം വോട്ടുകളുണ്ടെന്നാണ് വാദം. എന്നാല്‍ യുഡിഎഫ് സ്ഥാനാര്‍ഥി ഉമ തോമസിന് ലഭിച്ച വലിയ ലീഡില്‍ ട്വന്റി 20 വോട്ടുകള്‍ക്ക് പങ്കുണ്ടെന്നുവേണം കരുതാന്‍.

2016 ലെ തെരഞ്ഞെടുപ്പില്‍ തൃക്കാക്കരയില്‍ പി.ടി.തോമസ് ജയിച്ചത് 11996 വോട്ടിന്റെ ഭൂരിപക്ഷത്തിലാണ്. അന്ന് കോണ്‍ഗ്രസിന് 61451, ഇടതുപക്ഷത്തിന് 49455, ബി.ജെ.പി.ക്ക് 21247 എന്ന നിലയിലായിരുന്നു വോട്ടുകള്‍. 2021 ആയപ്പോഴാണ് ട്വന്റി 20 മത്സരരംഗത്ത് എത്തുന്നത്. നിലവിലെ മൂന്ന് പാര്‍ട്ടികള്‍ക്കും ബദല്‍ എന്ന നിലയിലായിരുന്നു പലരും ഇതിനെ കണ്ടത്. അതുകൊണ്ടുതന്നെ 2021-ലെ തെരഞ്ഞെടുപ്പില്‍ പതിമൂവായിരത്തിലേറെ വോട്ടുകള്‍ നേടാനും ട്വന്റി ട്വന്റിക്കായി. അന്ന് യു.ഡി.എഫിന് 2016-ലേതിനേക്കാള്‍ 2000-ഓളം വോട്ടുകളും എല്‍.ഡി.എഫിന് 5000-ഓളം വോട്ടുകളും ബി.ജെ.പി.ക്ക് 6000-ഓളം വോട്ടുകളുമാണ് നഷ്ടമായത്. പി.ടി.തോമസ് തൊട്ടടുത്ത എതിര്‍സ്ഥാനാര്‍ഥി ജെ.ജേക്കബിനേക്കാള്‍ 14329 വോട്ടിന്റെ ഭൂരിപക്ഷത്തിലാണ് ജയിച്ചത്.

ഇത്തവണ ട്വന്റി 20 മത്സര രംഗത്തുനിന്ന് മാറി. തൃക്കാക്കര തെരഞ്ഞെടുപ്പിന് രാഷ്ട്രീയ പ്രാധാന്യമില്ലെന്നും അടുത്ത പൊതുതെരഞ്ഞെടുപ്പില്‍ എല്ലാ സീറ്റിലും മത്സരിക്കുമെന്നുമായിരുന്നു അവരുടെ നിലപാട്. ആം ആദ്മി പാര്‍ട്ടിയുമായി ചേര്‍ന്നാണ് ട്വന്റി ട്വന്റി ഈ നിലപാട് അറിയിച്ചത്. എന്നാല്‍ എല്‍ഡിഎഫിന് കഴിഞ്ഞ തവണ ലഭിച്ചതിലും അധികം വോട്ടുകള്‍ ലഭിച്ചിട്ടും തിരിച്ചടിയുണ്ടായത് ട്വന്റി ട്വന്റി ആം ആദ്മി വോട്ടുകള്‍ യുഡിഎഫില്‍ കേന്ദ്രീകരിച്ചതുകൊണ്ടാണെന്നാണ് സിപിഐഎം വിലയിരുത്തല്‍. ഇതിനൊപ്പം എല്‍ഡിഎഫ് വിരുദ്ധ വോട്ടുകളും യുഡിഎഫില്‍ കേന്ദ്രീകരിച്ചുവന്നാണ് സിപിഐഎമ്മിന്റെ കണ്ടെത്തല്‍. വരും ദിവസങ്ങളില്‍ തോല്‍വിയെ കുറിച്ച് സിപിഐഎം സമഗ്രമായ പഠനം നടത്തും.

തൃക്കാക്കര ഉപതെരഞ്ഞെടുപ്പില്‍ 25,016 വോട്ടുകളുടെ റെക്കോര്‍ഡ് ഭൂരിപക്ഷത്തോടെയാണ് ഉമ തോമസിന്റെ ജയം. തൃക്കാക്കര ഇതുവരെ കണ്ടതിലെ ഏറ്റവും വലിയ ഭൂരിപക്ഷത്തോടെയാണ് കോണ്‍ഗ്രസിന്റെ ഏക വനിതാ എംഎല്‍എയായി ഉമ നിയമസഭയിലേക്ക് എത്തും. 2011 ബെന്നി ബെഹ്നാന്‍ മത്സരിക്കുമ്പോള്‍ 22,406 ആയിരുന്നു ഭൂരിപക്ഷം. 2021 പി.ടി.തോമസ് മത്സരിക്കുമ്പോള്‍ 14,329 വോട്ടുകളായിരുന്നു ഭൂരിപക്ഷം നേടിയിരുന്നത്. ആ റെക്കോര്‍ഡുകളാണ് ഉമ തോമസ് തകര്‍ത്തിരിക്കുന്നത്.

2011ലാണ് തൃക്കാക്കര മണ്ഡലം രൂപീകരിക്കുന്നത്. യുഡിഎഫിനു വേണ്ടി ബെന്നി ബഹനാന്‍, എല്‍ഡിഎഫിന്റെ എം.ഇ ഹസൈനാര്‍, എന്‍ഡിഎ സ്ഥാനാര്‍ഥി എന്‍. സജികുമാര്‍ എന്നിവരായിരുന്നു അന്ന് മത്സരരംഗത്ത്. 73.71 ശതമാനം േപരാണ് അന്ന് വോട്ടു ചെയ്തത്. ആകെ പോള്‍ ചെയ്ത 1,59,877 വോട്ടുകളില്‍ 68,854 (55.88 ശതമാനം) നേടി ബെന്നി ബെഹനാന്‍ വിജയിച്ചു. എം.ഇ. ഹസൈനാറിന് 43,448 (36 ശതമാനം) വോട്ടും എന്‍ സജി കുമാറിന് 5935 വോട്ടും (5.04 ശതമാനം) ലഭിച്ചു. ഈ തെരഞ്ഞെടുപ്പിലാണ് ബഹനാന്‍ 22,406 വോട്ടുകള്‍ക്ക് വിജയിക്കുന്നത്.

2016 ല്‍ ഈ സീറ്റില്‍ ബഹനാന് പകരം മത്സരിച്ചത് പി.ടി.തോമസായിരുന്നു. 1,35,304 വോട്ടുകള്‍ പോള്‍ ചെയ്തതില്‍ 61,268 എണ്ണം (45.42 ശതമാനം) നേടി പി.ടി.തോമസ് സീറ്റ് നിലനിര്‍ത്തി. മുന്‍ എം.പി കൂടിയായ സെബാസ്റ്റ്യന്‍ പോളിനെയായിരുന്നു അന്ന് ഇടതുപക്ഷം കളത്തിലിറക്കിയത്. എന്നാല്‍ 49,455 വോട്ടു (36.55 ശതമാനം) മാത്രമേ അദ്ദേഹത്തിനു ലഭിച്ചുള്ളൂ. അതേസമയം, ബിജെപി ശക്തമായ പോരാട്ടം കാഴ്ചവച്ചതും ഈ തിരഞ്ഞെടുപ്പിലാണ്. എന്‍ഡിഎയുടെ എസ് സജി 21,247 (15 ശതമാനം) വോട്ടുകളുമായി മൂന്നാം സ്ഥാനത്തെത്തി. മുന്‍ തിരഞ്ഞെടുപ്പിനേതിനേക്കാള്‍ 10.66 ശതമാനം വോട്ടുകള്‍ കൂടുകയും ചെയ്തു. 11,966 വോട്ടുകള്‍ക്കായിരുന്നു ഈ തെരഞ്ഞെടുപ്പില്‍ പി.ടി.തോമസിന്റെ വിജയം.

2016ലെ തിരഞ്ഞെടുപ്പില്‍ രണ്ട് പ്രമുഖ മുന്നണികളുടെയും എതിരാളികള്‍ക്കു പുറമെ ട്വന്റി20 സ്ഥാനാര്‍ഥിയേയും നേരിടേണ്ടി വന്നിരുന്നു പി.ടി. തോമസിന്. കിറ്റക്‌സ് കമ്പനിയിലെ രാസമാലിന്യങ്ങള്‍ തന്റെ തൃക്കാക്കര മണ്ഡലത്തിന്റെ ഓരംപറ്റിയൊഴുകുന്ന കടമ്പ്രയാറിനെ മലിനീകരിക്കുന്നു എന്നാരോപിച്ചാണ് പി.ടി രംഗത്തെത്തിയത്. സ്വന്തം സ്ഥാനാര്‍ഥിയെ രംഗത്തിറക്കിയാണ് ട്വന്റി20 പ്രതികരിച്ചത്. വോട്ടു വിഹിതം കുറഞ്ഞെങ്കിലും പി.ടി തോമസിന്റെ ഭൂരിപക്ഷം പക്ഷേ കൂടി. പോള്‍ ചെയ്ത 1,36,570 (70.36 ശതമാനം) വോട്ടുകളില്‍ പി.ടി തോമസ് 59,839 എണ്ണം (43.82 ശതമാനം) നേടി. ഇടതു സ്വതന്ത്രന്‍ ഡോ. ജെ. ജേക്കബ് 45,510 വോട്ടുകളുമായി (33.32 ശതമാനം) രണ്ടാമതും എന്‍ഡിഎയുടെ എസ് സജി 15,483 വോട്ടുകളുമായി (11.34 ശതമാനം) മൂന്നാമതും എത്തി. ട്വന്റി20 സ്ഥാനാര്‍ഥി ഡോ. ടെറി തോമസ് 13,897 (10.18 ശതമാനം) വോട്ടുകള്‍ നേടിയതായിരുന്നു ഈ തിരഞ്ഞെടുപ്പിനെ ശ്രദ്ധേയമാക്കിയത്. 14,329 ആയിരുന്നുൂ പി.ടിയുടെ ഭൂരിപക്ഷം. മണ്ഡലത്തിന്റെ ഈ ചരിത്രത്തെയെല്ലാം അപ്രസക്തമാക്കിയാണ് ഇത്തവണ ഉമ തോമസിന്റെ വിജയം.

ലോകത്തെവിടെ ആയാലും, 🕐 ഏത് സമയത്തും ട്വന്റിഫോർ വാർത്തകളും 🚀 ഓഗ്മെന്റഡ് റിയാലിറ്റി പാക്കേജുകളും 🔍എക്‌സ്‌പ്ലെയ്‌നറുകളും വിശദമായി കാണാൻ ഞങ്ങളുടെ ▶️ യൂടൂബ് ചാനൽ സബ്‌സ്‌ക്രൈബ് ചെയ്യുക 👉
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ Facebook Feed ൽ 24 News
Advertisement