ഡൽഹിയിലെ സംഘർഷം; എഐസിസി ഓഫീസിൽ അടിയന്തര യോ​ഗം ചേരുമെന്ന് കെസി വേണു​ഗോപാൽ

രാഷ്ട്രീയ പാർട്ടിയെന്ന നിലയിൽ കോൺ​ഗ്രസിനെ പ്രവർത്തിക്കാൻ പോലും അനുവദിക്കാത്ത തരത്തിലാണ് സർക്കാരിന്റെ സമീപനമെന്ന് കെസി വേണു​ഗോപാൽ എംപി. അടിയന്തരമായി എഐസിസി ഓഫീസിൽ യോ​ഗം ചേരാൻ പോവുകയാണ്. ജനാധിപത്യ വിരുദ്ധ മാർ​ഗങ്ങളിലൂടെയാണ് കോൺ​ഗ്രസിനെ അടിച്ചമർത്തുന്നത്. ഇന്ത്യയുടെ പല ഭാ​ഗങ്ങളിലും സമരം നടക്കുന്നുണ്ട്. നേതാക്കളുടെ അറസ്റ്റിലേക്ക് കാര്യങ്ങൾ പോയാൽ ഇതിലും വലിയ പ്രതിഷേധം സർക്കാർ കാണേണ്ടിവരുമെന്നും അദ്ദേഹം വ്യക്തമാക്കി.

രാഹുൽ ഗാന്ധിയെ ഇ ഡി ചോദ്യം ചെയ്യുന്നതിൽ ആശങ്കയില്ല. നേതാക്കളെ അകാരണമായി കസ്റ്റഡിയിൽ എടുക്കുകയാണ്. രാഹുൽ ഗാന്ധി മുൻ‌കൂർ ജാമ്യത്തിന് ശ്രമിക്കുന്നില്ല. ആവശ്യപ്പെടുമ്പോഴൊക്കെ ഹാജരാകും. വീട്ടിൽ നിന്നടക്കം നേതാക്കളെ അറസ്റ്റ് ചെയ്തു കൊണ്ടുപോവുകയാണ്, ഇ ഡി ബിജെപിയുടെ തെരഞ്ഞെടുപ്പ് വിഭാഗത്തിൻ്റെ ജോലിയാണ് ചെയ്യുന്നത്. എത്ര ദിവസം ഹാജരാകാൻ ആവശ്യപ്പെട്ടാലും ഹാജരായി മറുപടി നൽകും. ഈ കേസിൽ കള്ളപ്പണം വെളുപ്പിക്കൽ വരുന്നില്ല, ഒരാള് പോലും പണം കൈപ്പറ്റിയിട്ടില്ലെന്നും കെസി പറഞ്ഞു.

Read Also:പൊലീസ് നെഞ്ചത്ത് ചവിട്ടി, വലിച്ചിഴച്ചു; സംസാരിക്കാൻ പോലും കഴിയുന്നില്ലെന്ന് ജെബി മേത്തർ

ഡൽഹിയിൽ കോൺ​ഗ്രസിന്റെ ഇഡി ഓഫീസ് മാർച്ച് പൊലീസ് തടഞ്ഞതിനെതിരെ പ്രതിഷേധം തുടരുകയാണ്. ജെബി മേത്തർ ഉൾപ്പടെയുള്ള നേതാക്കളെ റോഡിലൂടെ വലിച്ചിഴച്ചാണ് പൊലീസ് വാഹനത്തിൽ കയറ്റിയത്. എഐസിസി ആസ്ഥാനത്താണ് മഹിളാ കോൺ​ഗ്രസ് പ്രവർത്തകർ പ്രതിഷേധം നടത്തിയത്. വളരെ സമാധാനപരമായി നടത്തിയ മാർച്ചിൽ പൊലീസാണ് പ്രശ്നങ്ങളുണ്ടാക്കിയതെന്ന് ജെബി മേത്തർ എം.പി പറഞ്ഞു.

പൊലീസ് നെഞ്ചത്ത് ചവിട്ടി, വലിച്ചിഴച്ചു, സംസാരിക്കാൻ പോലും കഴിയുന്നില്ല. വനിതാ കോൺ​ഗ്രസിന്റെ ദേശീയ അദ്ധ്യക്ഷയെ ഉൾപ്പടെ വളരെ മോശമായാണ് പൊലീസ് കൈകാര്യം ചെയ്തത്. ശക്തമായ പ്രതിഷേധം ഇനിയും സംഘടിപ്പിക്കും. ഇവിടത്തെ ജയിലുകൾ കോൺ​ഗ്രസുകാരെക്കൊണ്ട് നിറയും. എം.പിയെന്ന പരി​ഗണന പോലും നൽകാതെയാണ് പൊലീസ് കൈകാര്യം ചെയ്യുന്നത്. രാഹുൽ ​ഗാന്ധിക്ക് വേണ്ടി നിലകൊള്ളുന്നവരെ വാശിയോടെയാണ് കേന്ദ്രസർക്കാർ കാണുന്നത് – ജെബി മേത്തർ എം.പി വ്യക്തമാക്കി.

Story Highlights: Conflict in Delhi; KC VenuGopal says immediate meeting will be held at AICC office