ചാമ്പ്യന്മാര്‍ ഫൈനലില്‍; ഏരീസ് കൊല്ലം സെയിലേഴ്‌സ് കേരള ക്രിക്കറ്റ് ലീഗ് ഫൈനലില്‍

ഏരീസ് കൊല്ലം സെയിലേഴ്‌സ് കേരള ക്രിക്കറ്റ് ലീഗ് ഫൈനലില്‍ കടന്നു. തൃശൂര്‍ ടൈറ്റന്‍സിനെതിരെ പത്ത് വിക്കറ്റിന്റെ ആധികാരിക ജയത്തോടെയാണ് കൊല്ലത്തിന്റെ ഫൈനല്‍ പ്രവേശനം. ആദ്യം ബാറ്റ് ചെയ്ത തൃശ്ശൂര്‍ ടൈറ്റന്‍സ് 86 റണ്‍സിന് ഓള്‍ ഔട്ടായി. ഈ സീസണിലെ ഏറ്റവും കുറഞ്ഞ സ്‌കോറാണിത്. മറുപടി ബാറ്റിംഗിനിറങ്ങിയ കൊല്ലം വിക്കറ്റ് നഷ്ടമില്ലാതെ 61 പന്തുകള്‍ ബാക്കി നില്‍ക്കെയാണ് വിജയിച്ചത്.

31 പന്തില്‍ 56 റണ്‍സെടുത്ത ഭരത് സൂര്യയും 28 പന്തില്‍ 32 റണ്‍സ് എടുത്ത അഭിഷേക് ജെ നായരും ആണ് കൊല്ലത്തിന്റെ വിജയം അനായാസമാക്കിയത്. രണ്ടു വിക്കറ്റ് വീഴ്ത്തിയ കൊല്ലത്തിന്റെ അമല്‍ എ.ജിയാണ് പ്ലെയര്‍ ഓഫ് ദ മാച്ച്. കൊല്ലത്തിന്റെ തുടര്‍ച്ചയായ രണ്ടാം ഫൈനലാണിത്. നിലവില്‍ പുരോഗമിക്കുന്ന കാലിക്കറ്റ് ഗ്ലോബ്സ്റ്റാര്‍സും കൊച്ചി ബ്ലൂ ടൈഗേഴ്‌സും തമ്മിലുള്ള രണ്ടാം സെമിയിലെ വിജയികള്‍ മറ്റന്നാള്‍ ഫൈനലില്‍ കൊല്ലത്തിനെ നേരിടും.

Story Highlights : Aries Kollam Sailors in the Kerala Cricket League final