ഷാർജയിൽ സ്കൂളിലെത്തുന്ന രക്ഷിതാക്കൾക്ക്​ ഗ്രീൻപാസ്​ നിർബന്ധമാക്കി

ഷാർജയിലെ സ്കൂളുകളിൽ രക്ഷിതാക്കൾക്ക്​ അൽഹുസ്​ൻ ആപ്പിൽ ഗ്രീൻ പാസ്​ നിർബന്ധമാക്കി. കൊവിഡ്​ നിയന്ത്രണങ്ങളിൽ സർക്കാർ ഇളവ്​ പ്രഖ്യാപിച്ചതിന്​ പിന്നാലെയാണ്​ ഷാർജ പ്രൈവറ്റ്​ എജുക്കേഷൻ അതോറിറ്റി ​നിർദേശം പുറപ്പെടുവിച്ചത്.

സ്കൂളുകളുടെ ഗേറ്റിൽ അൽഹുസ്​ൻ ആപ്പിൽ ഗ്രീൻ പാസ്​ കാണിച്ചെങ്കിൽ മാത്രമെ ഉള്ളിലേക്ക്​ കടത്തിവിടുകയുള്ളൂ. പി.സി.ആർ പരിശോധന നടത്തുന്നവർക്കാണ്​ ഗ്രീൻപാസ്​ ലഭിക്കുന്നത്​. വാക്സിനെടുത്തവർക്ക്​ പരിശോധന നടത്തിയ ദിനം മുതൽ 30 ദിവസത്തേക്കും വാക്സിനെടുക്കാത്തവർക്ക്​ ഏഴ്​ ദിവസത്തേക്കുമാണ്​ ഗ്രീൻപാസ്​ ലഭിക്കുക.

Read Also: കൊവിഡ് ഒഴിഞ്ഞിട്ടില്ല; രാജ്യത്ത് ഇന്നലെ മാത്രം സ്ഥിരീകരിച്ചത് 4000ത്തിലധികം കേസുകള്‍

വിദ്യാർഥികൾക്കും അധ്യാപകർക്കും ജീവനക്കാർക്കും മാസ്ക്​ നിർബന്ധമില്ല. എന്നാൽ കൊവിഡ്​ സംശയിക്കപ്പെടുന്നവർ തിരിച്ചെത്തുമ്പോൾ നെഗറ്റീവ്​ പി.സി.ആർ ഫലം ഹാജരാക്കണം. കൊവിഡ്​ ബാധിതർക്ക്​ അഞ്ച്​ ദിവസം ഐസൊലേഷൻ മതി. കൊവിഡ്​ ബാധിച്ചവരുമായി അടുത്തിടപഴകിയവർക്ക്​ ക്വാറന്‍റീൻ വേണ്ട. പക്ഷെ രോഗലക്ഷണങ്ങളുണ്ടെങ്കിൽ പി.സി.ആർ പരിശോധന നടത്തണം. സ്കൂളിലെ ദിവസേനയുള്ള സാനിറ്റൈസേഷനും വൃത്തിയാക്കലും തുടരണമെന്നും നിർദേശമുണ്ട്​.

Story Highlights: Covid in UAE: Green Pass must for parents to visit schools in Sharjah