100 വർഷം പഴക്കമുള്ള ഒരു മരത്തിൽ നിന്ന് അരുവി പോലെ വെള്ളം ഒഴുകുന്നു; അപൂർവ പ്രതിഭാസത്തിന് പിന്നിൽ….

100 വർഷം പഴക്കമുള്ള ഒരു മരത്തിൽ നിന്ന് അരുവി പോലെ വെള്ളം ഒഴുകുന്നു. ഈ തലക്കെട്ട് കേട്ടാൽ ആരും ഒന്ന് അത്ഭുപ്പെട്ടേക്കാം. സോഷ്യൽ മീഡിയയിൽ വരെ ചർച്ചയായ തെക്കൻ യൂറോപ്പിലെ 100 വർഷം പഴക്കമുള്ള ഈ വൃക്ഷമാണിത്. തടിയിൽ നിറയെ വെള്ളം സൂക്ഷിക്കുന്ന മൾബറി മരം. അത്ഭുത മരമെന്നും വിളിക്കാം. ഈ വൃക്ഷത്തിൽ നിന്നും ഒലിച്ചിറങ്ങുന്ന വെള്ളത്തിന്റെ ദൃശ്യങ്ങളാണ് സോഷ്യൽ ഇടങ്ങളിലും മറ്റും ആളുകളെ അത്ഭുതപ്പെടുത്തിയത്.

യൂറോപ്പിലെ മോണ്ടിനെഗ്രോവിലെ ദിനോസ ഗ്രാമത്തിൽ നിന്നുള്ളതാണ് ഈ ദൃശ്യങ്ങൾ. ദൃശ്യങ്ങളിൽ കാണുന്നത് പ്രകാരം മരത്തിൽ നിന്നും വലിയ അളവിലാണ് വെള്ളം പുറത്തേക്ക് ഒഴുകുന്നത്. അതേസമയം തണുപ്പ് കാലത്തിന്റെ അവസാനമോ മഴക്കാലത്തോ ആണ് മരത്തിൽ നിന്നും ഇത്തരത്തിൽ വെള്ളം പുറത്തേക്ക് ഒഴുകുന്നത്.

കഴിഞ്ഞ ഇരുപത് വർഷമായി എല്ലാ വർഷവും ഇത്തരത്തിൽ മരത്തിൽ നിന്നും വെള്ളം പുറത്തക്ക് വരാറുണ്ട്. തറയിൽ നിന്ന് ഏകദേശം 1.5 മീറ്റർ ഉയരത്തിലുള്ള മരത്തിന്റെ പൊത്തിൽ നിന്നാണ് വെള്ളം പുറത്തേക്ക് വരുന്നത്. വർഷത്തിൽ ഒരിക്കൽ മാത്രം സംഭവിക്കുന്ന ഈ പ്രതിഭാസം മൂന്നോ നാലോ ദിവസമായിരിക്കും ഉണ്ടാവുക. അതേസമയം ഈ മരത്തിനും ഏറെ പ്രത്യേകതകൾ കാണാൻ കഴിയും. ഇലകളില്ലാത്ത മരത്തിന്റെ തടിയിൽ നിന്നാണ് ഇത്തരത്തിൽ അരുവി പോലെ വെള്ളം ഒഴുകുന്നത്. അതിന് പുറമെ നിരവധി വിനോദ സഞ്ചാരികളാണ് ഇവിടേക്ക് എല്ലാ വർഷവും ഈ അത്ഭുത പ്രതിഭാസം കാണുന്നതിനായി എത്തുന്നത്.

അതേസമയം ഉള്ള് നിറയെ വെള്ളവുമായി വളരുന്ന ഒരു മരങ്ങൾ ലോകത്തിന്റെ വിവിധ ഇടങ്ങളിൽ കണ്ടെത്തിയിട്ടുണ്ട്. ആഫ്രിക്ക, ഓസ്‌ട്രേലിയ, മഡഗാസ്കർ എന്നിവടങ്ങളിലും ഇത്തരം മരങ്ങൾ കണ്ടെത്തിയിട്ടുണ്ട്. താഴ്ന്ന പ്രദേശങ്ങളിൽ വളരുന്ന ഈ വിചിത്ര മരത്തിന്റെ പേര് ബോബാബ് എന്നാണ്. അതേസമയം മരത്തിന്റെ തടിയിൽ വെള്ളം സൂക്ഷിക്കുന്നതിനാൽ ഇതിനെ ബോട്ടിൽ ട്രീ എന്നും ആളുകൾ വിളിക്കാറുണ്ട്. അതിന് പുറമെ ജീവ വൃക്ഷം, തലകീഴായ മരം എന്നൊക്കെ ഇവ അറിയപ്പെടുന്നുണ്ട്. ഏകദേശം ഒരു ലക്ഷം ലിറ്റർ വെള്ളം വരെ സംഭരിച്ചു വയ്ക്കാനുള്ള കഴിവ് ഈ മരത്തിന് ഉണ്ടെന്നാണ് പൊതുവെ പറയുന്നത്. വരണ്ട കാലാവസ്ഥയിൽ പ്രകൃതിയ്ക്ക് ആശ്വാസമാകുന്നതിനൊപ്പം നിരവധി ജീവജാലങ്ങൾക്കും ഈ മരം ജലസ്രോതസായി മാറാറുണ്ട്.

Story Highlights: Rare Phenomenon of Water Gushing Out Of Mulberry