മുടിയിൽ പിടിച്ച് കട്ടിലിൽ തള്ളി, പിന്നാലെ അസഭ്യവര്‍ഷം; യുപിയിൽ രോഗിയോട് നഴ്‌സിൻ്റെ ക്രൂരത

ഉത്തർപ്രദേശിലെ സർക്കാർ ആശുപത്രിയിൽ രോഗിയോട് നഴ്‌സിൻ്റെ ക്രൂരത. ഡ്യൂട്ടിയിൽ ഉണ്ടായിരുന്ന നഴ്‌സ് രോഗിയായ സ്ത്രീയെ മുടിയിൽ പിടിച്ച് വലിച്ച് കിടക്കയിലേക്ക് തള്ളിയിട്ടു. സംഭവത്തിൻ്റെ വീഡിയോ സോഷ്യൽ മീഡിയയിൽ വൈറലാകുകയാണ്. അതേസമയം നഴ്‌സിന്റെ നടപടിയെ ന്യായീകരിച്ച് ആശുപത്രി അധികൃതർ രംഗത്തെത്തി.

ഒക്‌ടോബർ 18ന് വൈകുന്നേരമാണ് മാനസിക പ്രശ്നങ്ങൾ നേരിടുന്ന സ്ത്രീയെ സീതാപൂർ ജില്ലാ ആശുപത്രിയിൽ പ്രവേശിപ്പിച്ചത്. 19 ന് വൈകുന്നേരം യുവതിയെ ഉപേക്ഷിച്ച് വീട്ടുകാർ നാട്ടിലേക്ക് മടങ്ങി. രാത്രി 12 ഓടെ ഉറക്കം ഉണർന്ന യുവതി ഉച്ചത്തിൽ നിലവിളിക്കാൻ ആരംഭിച്ചു. ബഹളം കേട്ട് വാർഡിൽ ഉണ്ടായിരുന്ന മറ്റ് രോഗികൾ ഉണർന്നു. ശബ്‌ദം കേട്ട് ഒരു സ്റ്റാഫ് നഴ്സ് ഓടിയെത്തി.

യുവതിയോട് കിടക്കയിലേക്ക് പോകാനും മിണ്ടാതിരിക്കാനും ആവശ്യപ്പെട്ടു. എന്നാൽ യുവതി വഴങ്ങിയില്ല, ഇതോടെ നഴ്സ് മുടിയിൽ പിടിച്ച് കിടക്കയിലേക്ക് തള്ളിയിടുകയായിരുന്നുവെന്ന് മറ്റ് രോഗികൾ പറഞ്ഞു. ഇതിനിടയിൽ ആരോ ഇയാളുടെ വീഡിയോ പകർത്തി. സംഭവം പുറത്തായതോടെ അതിരൂക്ഷ വിമർശനമാണ് നഴ്സിനെതിരെ ഉയർന്നത്. പിന്നാലെ വിഷയത്തിൽ അന്വേഷണം ആരംഭിച്ചിട്ടുണ്ട്.

Story Highlights: UP Nurse Grabs Patient By Hair Pins Her Down