രഞ്ജി ട്രോഫി: വീണ്ടും രക്ഷകനായി സച്ചിൻ ബേബി; സർവീസസിനെതിരെ കേരളം ഭേദപ്പെട്ട നിലയിൽ

രഞ്ജി ട്രോഫി എലീറ്റ് ഗ്രൂപ്പ് സിയിൽ സർവീസസിനെതിരെ കേരളം ഭേദപ്പെട്ട നിലയിൽ. ആദ്യ ദിനം അവസാനിക്കുമ്പോൾ കേരളം 6 വിക്കറ്റ് നഷ്ടത്തിൽ 254 റൺസ് നേടിയിട്ടുണ്ട്. 133 റൺസുമായി പുറത്താവാതെ നിൽക്കുന്ന സച്ചിൻ ബേബിയാണ് കേരളത്തിൻ്റെ രക്ഷകനായത്. ആദ്യ നാല് വിക്കറ്റുകൾ ഒറ്റയക്കത്തിൽ പുറത്തായതിനു ശേഷം, 4 വിക്കറ്റ് നഷ്ടത്തിൽ 19 റൺസ് എന്ന നിലയിൽ നിന്നാണ് കേരളം മത്സരത്തിലേക്ക് തിരികെവന്നത്. (ranji kerala score services)

Read Also: രഞ്ജി ട്രോഫി: നിരാശപ്പെടുത്തി ബാറ്റർമാർ; ഗോവയ്ക്കെതിരെ കേരളത്തിന് തോൽവി

പരുക്കേറ്റ സഞ്ജു സാംസൺ വീണ്ടും പുറത്തിരുന്നപ്പോൾ രോഹൻ കുന്നുമ്മൽ, ഷോൺ റോജർ, എൻപി ബേസിൽ എന്നിവർക്കും ടീമിൽ ഇടം ലഭിച്ചില്ല. എംഡി നിഥീഷ്, വത്സൽ ഗോവിന്ദ്, സൽമാൻ നിസാർ എന്നിവർ പകരമെത്തി. തകർച്ചയോടെയാണ് കേരളം തുടങ്ങിയത്. രോഹൻ കുന്നുമ്മലിൻ്റെ അഭാവനത്തിൽ പൊന്നം രാഹുലിനൊപ്പം ഇന്നിംഗ്സ് ഓപ്പൺ ചെയ്ത ജലജ് സക്സേന (8), പൊന്നം രാഹുൽ (0), രോഹൻ പ്രേം (1), വത്സൽ ഗോവിന്ദ് (1) എന്നിവർ സ്കോർബോർഡിൽ 19 റൺസ് മാത്രമുള്ളപ്പോൾ പവലിയനിലെത്തി. അവിടെനിന്നാണ് കേരളം പൊരുതിത്തുടങ്ങിയത്.

Read Also: രഞ്ജി ട്രോഫി: രണ്ടാം ദിനത്തിൽ നിരാശ; ഗോവയ്ക്കെതിരെ കേരളം 265 റൺസിനു പുറത്ത്

അഞ്ചാം വിക്കറ്റിൽ സച്ചിൻ ബേബിയും ഷോൺ റോജറിനു പകരമെത്തിയ സൽമാൻ നിസാറും ചേർന്ന് കേരളത്തെ വലിയ തകർച്ചയിൽ നിന്ന് രക്ഷിച്ചു. 96 റൺസിൻ്റെ നിർണായക കൂട്ടുകെട്ടിനൊടുവിൽ സൽമാൻ (42) മടങ്ങി. തുടർന്ന് ആറാം വിക്കറ്റിൽ അക്ഷയ് ചന്ദ്രനൊപ്പം ചേർന്ന് സച്ചിൻ ബേബി വീണ്ടും കേരള ഇന്നിംഗ്സിനെ മുന്നോട്ടുനയിച്ചു. 65 റൺസാണ് ഈ കൂട്ടുകെട്ടിലുയർന്നത്. 32 റൺസെടുത്ത് അക്ഷയ് ചന്ദ്രൻ മടങ്ങിയതോടെ ഈ കൂട്ടുകെട്ട് അവസാനിച്ചു. അപരാജിതമായ ഏഴാം വിക്കറ്റിൽ സ്റ്റാൻഡ് ഇൻ ക്യാപ്റ്റൻ സിജോമോൻ ജോസഫുമായി ചേർന്ന് സച്ചിൻ ബേബി വീണ്ടും കേരളത്തിൻ്റെ കൈപിടിച്ചു. 74 റൺസാണ് ഇരുവരും ചേർന്ന് ഇതുവരെ കൂട്ടിച്ചേർത്തത്. ഇതിനിടെ സച്ചിൻ ബേബി തൻ്റെ സെഞ്ചുറിയും തികച്ചു. സച്ചിൻ ബേബിയും (133), സിജോമോൻ ജോസഫും (29) നോട്ടൗട്ടാണ്.

Story Highlights: ranji trophy kerala score services