അന്തരിച്ച സംവിധായകൻ സിദ്ദിഖിന്റെ വേർപാടിൽ അനുശോചനം രേഖപ്പെടുത്തി സെവൻത് ഡേ അഡ്വന്റിസ്റ്റ് സഭ

അന്തരിച്ച സംവിധായകൻ സിദ്ദിഖിന്റെ വേർപാടിൽ അനുശോചനം രേഖപ്പെടുത്തി സെവൻത് ഡേ അഡ്വന്റിസ്റ്റ് സഭ. കടവന്ത്ര രാജീവ് ഗാന്ധി ഇൻഡോർ സ്റ്റേഡിയത്തിൽ നടന്ന പൊതുദർശനത്തിലാണ് സഭയ്ക്ക് വേണ്ടി സഭയുടെ കേരള ഘടകം കമ്മ്യൂണിക്കേഷൻ ഡയറക്ടർ പാസ്റ്റർ ടി.കെ അജിത് അനുശോചനം രേഖപ്പെടുത്തിയത്.

സിദ്ദിഖുമായി പാസ്റ്റർ ടി.കെ അജിത്തിനുണ്ടായ വ്യക്തിപരമായ സുഹൃത്ത് ബന്ധത്തെ കുറിച്ച് അദ്ദേഹം പറഞ്ഞു. മലയാള സിനിമയിലെ എക്കാലവും ഓർപ്പിക്കപ്പെടുന്ന ഒരു മഹത് വ്യക്തിയാണ് സിദ്ദിഖെന്നും കുടുംബത്തിന് ഈ പ്രതിസന്ധിഘട്ടം തരണം ചെയ്യാൻ കരുത്തുണ്ടാകട്ടെയെന്ന് പ്രാർത്ഥിക്കുന്നുവെന്നും അദ്ദേഹം പറഞ്ഞു.

ചൊവ്വാഴ്ച രാത്രിയാണ് സിദ്ദിഖ് അന്തരിച്ചത്. കൊച്ചി അമൃത ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലായിരുന്നു. കരൾ സംബന്ധമായ രോഗത്തെ തുടർന്ന് ചികിത്സയ്ക്കായി കഴിഞ്ഞ മാസമാണ് സിദ്ദിഖിനെ ആശുപത്രിയിൽ പ്രവേശിപ്പിച്ചത്. കഴിഞ്ഞ ദിവസം ന്യുമോണിയ ബാധിച്ചു. ഇതിനിടെ തിങ്കളാഴ്ച മൂന്നുമണിയോടെ ഹൃദയാഘാതം സംഭവിക്കുകയായിരുന്നു. പിന്നാലെ ഇന്നലെ രാത്രിയോടെ മരണം സംഭവിച്ചു. ഇന്ന് വൈകീട്ട് 6 മണിക്കാണ് ഖബറടക്കം.

Story Highlights :