ഉണ്ണി മുകുന്ദൻ ചിത്രം കാണാൻ ആദ്യ ടിക്കറ്റ് എടുത്ത് എ എൻ ഷംസീർ; ‘മാർക്കോ’യ്ക്ക് പ്രതീക്ഷകളേറെയെന്ന് സ്പീക്കർ

ഉണ്ണി മുകുന്ദൻ ചിത്രത്തിന്റെ ആദ്യ ടിക്കറ്റ് ബുക്കിംഗ് നിർവ്വഹിച്ച് കേരള സ്പീക്കർ എ.എൻ ഷംസീര്‍. ‘മാർക്കോ’യുടെ ആദ്യ ടിക്കറ്റ് എടുത്തുകൊണ്ട് സിനിമയുടെ അണിയറപ്രവർത്തകർക്ക് എ എൻ ഷംസീര്‍ ആശംസകൾ അറിയിച്ചു.ഉണ്ണി മുകുന്ദൻ തന്നെയാണ് വിഡിയോ ഫേസ്ബുക്കിലൂടെ പങ്കുവച്ചത്.

‘എറെ നാളായി പരിചയമുള്ള പ്രിയ സുഹൃത്ത് ഷെരീഫ് മുഹമ്മദ് നിർമ്മിക്കുന്ന ആദ്യ സിനിമയാണ് മാ‍ർക്കോയെന്നും ഉണ്ണി മുകുന്ദൻ നായകനായെത്തുന്ന ഈ ചിത്രത്തിന് വലിയ വിജയം ആശംസിക്കുന്നുവെന്നും ടിക്കറ്റ് ബുക്കിംഗ് നിർവ്വഹിച്ചുകൊണ്ട് സ്പീക്കർ പറഞ്ഞു.

ഡിസംബർ 20ന് ലോകമെങ്ങും റിലീസിനെത്തുന്ന ചിത്രത്തിന്‍റെ അഡ്വാൻസ് ടിക്കറ്റ് ബുക്കിംഗിന് ഇതോടെ തുടക്കമായിരിക്കുകയാണ്. ലോകമെങ്ങുമുള്ള തിയേറ്ററുകളിൽ 5 ഭാഷകളിലായി ചിത്രമെത്തും.

ഹനീഫ് അദേനി സംവിധാനം ചെയ്യുന്ന മാർക്കോ 100 ദിവസം എടുത്താണ് ചിത്രീകരണം പൂർത്തിയാക്കിയത്. ഇതിൽ 60 ദിവസവും ആക്ഷൻ രം​ഗങ്ങൾക്ക് വേണ്ടിയാണ് മാറ്റിവച്ചത്. മലയാള സിനിമയിലെ മറ്റൊരു നാഴികക്കല്ലായി മാറാൻ പോകുന്ന ത്രില്ലറാണിതെന്ന് അണിയറ പ്രവർത്തകർ അവകാശപ്പെടുന്ന ചിത്രം 30 കോടി ബജറ്റിലാണ് ഒരുങ്ങിയതെന്നാണ് വിവരം.

Story Highlights : AN Shamseer Marco Movie ticket booked