‘മയക്കുമരുന്നിനും അക്രമങ്ങൾക്കും എതിരെ പോരാടാം’; SKN 40 ജനകീയ ക്യാമ്പയിന് പിന്തുണയുമായി ഗായിക സിത്താര കൃഷ്ണകുമാർ

മാധ്യമ രംഗത്ത് 40 വർഷം പിന്നിടുന്ന വേളയിൽ ട്വൻ്റിഫോർ ചീഫ് എഡിറ്റർ ആർ ശ്രീകണ്ഠൻ നായർ നയിക്കുന്ന ലഹരിവിരുദ്ധ പര്യടനത്തിന് ആശംസകളുമായി ഗായിക സിത്താര കൃഷ്ണകുമാർ.

”മാധ്യമപ്രവർത്തന രംഗത്ത് 40 വർഷം പിന്നിടുന്ന എസ്കെഎന്നിന് ഹൃദയം നിറഞ്ഞ ആശംസകൾ. ഈ ചരിത്ര മുഹൂർത്തത്തിന്റെ ഭാഗമായി നടത്തുന്ന, ഒരുമാസം നീണ്ടുനിൽക്കുന്ന SKN 40 ജനകീയ ക്യാമ്പയിന് എല്ലാ പിന്തുണയും ആശംസയും അറിയിക്കുന്നു. നമുക്കൊരുമിച്ച് ലഹരിക്കെതിരെ പോരാടാം” – സിത്താര പറഞ്ഞു.

വ്യാപകമാകുന്ന മയക്കുമരുന്നിനും വർധിക്കുന്ന അക്രമങ്ങൾക്കുമെതിരെ ജനങ്ങളെ അണിനിരത്തുകയാണ് SKN40 ലഹരിവിരുദ്ധ ക്യാമ്പയിൻ്റെ ലക്ഷ്യം. ആർ ശ്രീകണ്ഠൻ നായരുടെ കേരള യാത്രക്ക് നാളെ തിരുവനന്തപുരത്ത് തുടക്കമാകും. ഫ്‌ളവേഴ്‌സും ട്വൻറിഫോറും ചേർന്നാണ് പരിപാടി സംഘടിപ്പിക്കുന്നത്.

എൻ്റെ കേരളം എൻ്റെ അഭിമാനം എന്ന കേരള യാത്രയുടെ മുഖ്യ സന്ദേശം അരുത് അക്രമം, അരുത് ലഹരി എന്നതാണ്. പരിപാടിയുടെ ഔദ്യോഗിക ഉദ്ഘാടനം നാളെ വൈകിട്ട് 6 മണിക്ക് ടാഗോർ തീയറ്ററിൽ നടക്കും. ഉദ്ഘാടനത്തോട് അനുബന്ധിച്ച് സിത്താര കൃഷ്ണകുമാറിൻ്റെ ബാൻഡായ പ്രൊജക്ട് മലബാറിക്കസിൻ്റെ സംഗീത വിരുന്നുമുണ്ടാകും.

രണ്ട് ഘട്ടങ്ങളിലായി 14 ജില്ലകളിലൂടെയും SKN40 ജനകീയ പര്യടനം കടന്നുപോകും. വിവിധ മേഖലകളിലുള്ളവരുമായി നേരിട്ട് സംവദിച്ച് സമൂഹത്തെ ഗ്രസിക്കുന്ന പ്രശ്നങ്ങൾക്ക് എതിരെ ജനകീയ മുന്നേറ്റം സാധ്യമാക്കാനുള്ള ഉദ്യമമാണ് എസ്കെഎൻ40 റോഡ് ഷോയിലൂടെ ലക്ഷ്യമിടുന്നത്. രാസലഹരി ഉപയോഗം പോലുള്ള വിപത്തുകളില്‍ നിന്ന് സമൂഹത്തെ രക്ഷപ്പെടുത്താനുള്ള മാര്‍ഗങ്ങള്‍ ആലോചിക്കുന്ന ജനകീയ വേദിയായിരിക്കും എസ്കെഎൻ40 റോഡ് ഷോ.

യുവാക്കളെ കുടുക്കുന്ന അദൃശ്യമായ ലഹരി വലയുടെ കണ്ണികള്‍ കണ്ടെത്താനും നാടിനെ വിറപ്പിക്കുന്ന അക്രമങ്ങൾ ഒഴിവാക്കാനുമുള്ള ക്രിയാത്മകമായ ചര്‍ച്ചകള്‍ റോഡ് ഷോയുടെ ഭാഗമായി നടക്കും. ലഹരിയില്‍ നിന്ന് കുട്ടികളെ തിരികെപ്പിടിക്കാന്‍ മാതാപിതാക്കളെ അണിനിരത്തി കര്‍മപരിപാടികള്‍ ആലോചിക്കും.

കേരളത്തിൽ സിന്തറ്റിക് ലഹരി പദാർഥങ്ങൾ ഉൾപ്പെടെ വ്യാപകമാവുകയും അക്രമങ്ങൾ കൂടുകയും ചെയ്യുമ്പോൾ, പ്രതിരോധം തീർക്കേണ്ടത് ഓരോരുത്തരുടെയും കടമ കൂടിയാണ്. അതിനായുള്ള ജനകീയ സംവാദ വേദിയാണ് ‘SKN 40’ എന്ന ജനകീയ യാത്രയിലൂടെ ട്വന്റിഫോർ ഒരുക്കുന്നത്. പര്യടനത്തിനിടെയുള്ള ചര്‍ച്ചയില്‍ ഉയര്‍ന്നുവരുന്ന ക്രിയാത്മക നിര്‍ദേശങ്ങള്‍ ക്രോഡീകരിച്ച് റിപ്പോര്‍ട്ടായി മുഖ്യമന്ത്രിയ്ക്കും എക്‌സൈസ് വകുപ്പ് മന്ത്രിയ്ക്കും കൈമാറും.

Story Highlights : Sithara Krishnakumar about SKN 40 Campaign