‘ഡെമോക്രാറ്റിക് സ്ഥാനാര്‍ഥികളെ പിന്തുണച്ചാല്‍ ഗുരുതരമായ പ്രത്യാഘാതങ്ങള്‍ നേരിടേണ്ടിവരും’: മസ്‌കിന് മുന്നറിയിപ്പുമായി ട്രംപ്

ബജറ്റ് ബില്ലിനെ എതിര്‍ത്ത് വോട്ട് ചെയ്യാന്‍ ഡെമോക്രാറ്റിക് പാര്‍ട്ടി സ്ഥാനാര്‍ഥികള്‍ക്ക് ധനസഹായം നല്‍കാന്‍ ഇലോണ്‍ മസ്‌ക് തീരുമാനിച്ചാല്‍ അതിന്റെ പ്രത്യാഘാതം അനുഭവിക്കേണ്ടി വരുമെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. മസ്‌കുമായുള്ള ബന്ധം അവസാനിച്ചുവെന്നും ട്രംപ്. മസ്‌ക് പ്രസിഡന്റിന്റെ ഓഫീസിനോട് അനാദരവ് കാട്ടുന്നുവെന്നും ട്രംപ് ആരോപിച്ചു. എന്‍ബിസി ന്യൂസിന് നല്‍കിയ അഭിമുഖത്തിലാണ് ട്രംപിന്റെ മുന്നറിയിപ്പ്.

അതിനിടെ, ട്രംപിനെതിരെയുള്ള വിവാദ ട്വീറ്റ് മസ്‌ക് പിന്‍വലിച്ചു. ജെഫ്രി എപ്‌സ്റ്റെയ്‌ന്റെ ലൈംഗിക ആരോപണ കേസ് ഫയലില്‍ ട്രംപിന്റെ പേരുള്ളതുകൊണ്ടാണ് ഫയല്‍ പുറത്തുവിടാത്തതെന്നായിരുന്നു ഇലോണ്‍ മസ്‌കിന്റെ പോസ്റ്റ്. നികുതി ബില്ലിലെ എതിര്‍പ്പിനെ തുടര്‍ന്ന് ട്രംപും മസ്‌ക്കും തമ്മില്‍ സമൂഹമാധ്യമങ്ങളില്‍ കടുത്ത വാക്‌പോര് നടത്തിയിരുന്നു. ജൂലൈ നാലിന് ബില്ല് പ്രസിഡന്റിന്റെ മുന്നിലെത്തും.

കഴിഞ്ഞ ദിവസമാണ് ട്രംപും മസ്‌കുമായുള്ള ഭിന്നത വഷളായത്. ഡോണള്‍ഡ് ട്രംപിനെ ഇംപീച്ച് ചെയ്യണമെന്ന സമൂഹമാധ്യമ പോസ്റ്റിനോട് ‘യെസ്’ ഇലോണ്‍ മസ്‌ക് ‘യെസ്’ പറയുകയായിരുന്നു. ട്രംപിന്റെ താരിഫ് നയം സാമ്പത്തിക മാന്ദ്യത്തിലേക്ക് നയിക്കുമെന്നും വിമര്‍ശനം. ജെഫ്രി എപ്സ്റ്റീന്റെ ലൈംഗിക ആരോപണ കേസ് ഫയലില്‍ ട്രംപിന്റെ പേരുണ്ടെന്നും ഇലോണ്‍ മസ്‌ക് വെളിപ്പെടുത്തി. മസ്‌കില്‍ താന്‍ നിരാശനാണെന്നും ട്രംപ് പ്രതികരിച്ചു. മസ്‌കുമായി ഇനി നല്ല ബന്ധം തുടരുമോ എന്നതില്‍ സംശയമെന്നും ട്രംപ്. ട്രംപ് -മസ്‌ക് പോരിന് പിന്നാലെ ടെസ്ലയുടെ ഓഹരികള്‍ 15 ശതമാനം ഇടിഞ്ഞു.

Story Highlights : Trump warns Musk of ‘serious consequences’ about supporting Democrats