AI ആർക്കും പഠിക്കാം; ഗൂഗിളിന്റെ 8 സൗജന്യ ഓൺലൈൻ AI കോഴ്സുകൾ

ആർട്ടിഫിഷ്യൽ ഇൻ്റലിജൻസ് (AI) എല്ലാ മേഖലകളിലും പിടിമുറുക്കുന്ന ഈ കാലത്ത് AI ടൂളുകൾ ഉപയോഗിക്കാനറിയുന്നവർക്ക് തൊഴിൽ സാധ്യതകളും വർധിച്ചുവരികയാണ്. ഈ സാഹചര്യത്തിൽ തികച്ചും സൗജന്യമായി AI കോഴ്സുകൾ പഠിക്കാൻ ഒരു അവസരം ലഭിച്ചാലോ? ഗൂഗിൾ അതിനുള്ള സൗകര്യമൊരുക്കിയിരിക്കുകയാണ്.

[Google's 8 free online AI courses]


1. ഇൻട്രൊഡക്ഷൻ ടു ജനറേറ്റീവ് AI (ദൈർഘ്യം: 45 മിനിറ്റ്)

ജനറേറ്റീവ് AI-യുടെ ലോകത്തേക്ക് കടക്കാനുള്ള ആദ്യ ചുവടാണ് ഈ 45 മിനിറ്റ് കോഴ്സ്. എന്താണ് ജനറേറ്റീവ് AI എന്നും അത് സാധാരണ മെഷീൻ ലേണിംഗിൽ നിന്ന് എങ്ങനെ വ്യത്യസ്തമാണെന്നും ഇവിടെ പഠിക്കാം. സ്വന്തമായി Gen AI ആപ്ലിക്കേഷനുകൾ നിർമ്മിക്കാൻ ഗൂഗിളിന്റെ ടൂളുകൾ എങ്ങനെ ഉപയോഗിക്കാമെന്നും ഈ കോഴ്സ് പരിചയപ്പെടുത്തുന്നു.

2. ഇൻ്ട്രൊഡക്ഷൻ ടു ലാർജ് ലാംഗ്വേജ് മോഡൽസ് (ദൈർഘ്യം: 1 മണിക്കൂർ)

ലാർജ് ലാംഗ്വേജ് മോഡലുകൾ (LLM) എന്താണെന്ന് മനസ്സിലാക്കുകയാണ് ഈ കോഴ്സിൻ്റെ പ്രധാന ലക്ഷ്യം. ഗൂഗിളിൻ്റെ സ്വന്തം LLM മോഡലുകളുമായി ബന്ധപ്പെട്ടാണ് ഈ കോഴ്സ് രൂപകൽപ്പന ചെയ്തിരിക്കുന്നത്. ജെമിനിയും ചാറ്റ്‌ജിപിടിയും പോലുള്ള AI ടൂളുകളിൽ നിന്ന് മികച്ച ഫലം നേടുന്നതിന് എങ്ങനെ ഫലപ്രദമായി പ്രോംപ്റ്റ് ചെയ്യാമെന്നും സമയം ലാഭിക്കാമെന്നും ഇതിലൂടെ പഠിക്കാം.

3. ഇൻ്ട്രൊഡക്ഷൻ ടു റെസ്‌പോൺസിബിൾ AI (ദൈർഘ്യം: 30 മിനിറ്റ്)

AI സാങ്കേതികവിദ്യകൾ വികസിപ്പിക്കുമ്പോഴും ഉപയോഗിക്കുമ്പോഴും ധാർമ്മികത എത്ര പ്രധാനമാണെന്ന് ഈ 30 മിനിറ്റ് കോഴ്സ് പഠിപ്പിക്കും. പ്രായോഗിക തലത്തിൽ റെസ്‌പോൺസിബിൾ AI എങ്ങനെയാണ് പ്രവർത്തിക്കുന്നതെന്ന് ഈ കോഴ്സ് ലളിതമായി വിശദീകരിക്കുന്നു. ഗൂഗിളിന്റെ ഏഴ് AI തത്വങ്ങളെക്കുറിച്ചും AI-യുടെ ധാർമ്മിക വശങ്ങളെക്കുറിച്ചും ഈ കോഴ്സിലൂടെ വ്യക്തമായ ധാരണ ലഭിക്കും.

4. ഇൻ്ട്രൊഡക്ഷൻ ടു ഇമേജ് ജനറേഷൻ (ദൈർഘ്യം: 30 മിനിറ്റ്)

AI -ജനറേറ്റഡ് ദൃശ്യങ്ങള്‍ക്ക് പിന്നിലെ സാങ്കേതിക വിദ്യകൾ എന്തൊക്കെയാണെന്ന് വെളിപ്പെടുത്തുന്ന ഒരു കോഴ്സാണിത്. ബ്രാൻഡിംഗ്, സോഷ്യൽ മീഡിയ, UI ഡിസൈൻ, ഇ-കൊമേഴ്‌സ് തുടങ്ങിയ വിവിധ മേഖലകളിൽ AI ഉപയോഗിച്ച് ചിത്രങ്ങൾ എങ്ങനെ കൂടുതൽ ആകർഷകവും ആശയവിനിമയം നടത്താൻ കഴിവുള്ളതുമാക്കാം എന്ന് ഈ കോഴ്സ് പഠിപ്പിക്കും. കുറഞ്ഞ സമയം കൊണ്ട് AI ഇമേജ് ജനറേഷൻ്റെ അടിസ്ഥാനകാര്യങ്ങൾ മനസ്സിലാക്കാൻ ഇത് സഹായിക്കുകയും ചെയ്യുന്നു.

Read Also: യുകെയിലെ 6 സർവകലാശാലകൾ ഇന്ത്യയിൽ ക്യാമ്പസുകൾ ആരംഭിക്കും; ഇന്ത്യ- യുകെ സ്വാതന്ത്ര്യ വ്യാപാര കരാറിന് അംഗീകാരം

5. അറ്റൻഷൻ മെക്കാനിസം (ദൈർഘ്യം: 45 മിനിറ്റ്]

AI-യുടെ ലോകത്ത് അറ്റൻഷൻ മെക്കാനിസം എങ്ങനെയാണ് പ്രവർത്തിക്കുന്നതെന്ന് ഈ 45 മിനിറ്റ് കോഴ്സ് പഠിപ്പിക്കുന്നു. പരിഭാഷ (Translation), സംഗ്രഹം (Summarization), ചോദ്യോത്തര സംവിധാനങ്ങൾ എന്നിവയിൽ ഈ സാങ്കേതികവിദ്യയുടെ പ്രാധാന്യം മനസ്സിലാക്കാം. ഡോക്യുമെൻ്റേഷൻ, ഗവേഷണം, കണ്ടൻ്റ് നിർമ്മാണം തുടങ്ങിയ മേഖലകളിൽ പ്രവർത്തിക്കുന്നവർക്ക് ഈ കോഴ്സ് വളരെ പ്രയോജനകരമാണ്. സങ്കീർണ്ണമായ വിവരങ്ങളെ AI എങ്ങനെ ഫലപ്രദമായി കൈകാര്യം ചെയ്യുന്നു എന്ന് പഠിക്കാൻ ഇത് സഹായിക്കും.

6. ട്രാൻസ്‌ഫോമർ മോഡൽസ് ആൻഡ് BERT മോഡൽ (ദൈർഘ്യം: 45 മിനിറ്റ്)

AI-യിലെ ഏറ്റവും നൂതനമായ സാങ്കേതികവിദ്യകളിലൊന്നായ ട്രാൻസ്‌ഫോർമർ മോഡലുകളെക്കുറിച്ച് ആഴത്തിൽ മനസ്സിലാക്കാൻ ഈ 45 മിനിറ്റ് കോഴ്സ് സഹായിക്കും. BERT മോഡലിന്റെ പ്രവർത്തനവും പ്രാധാന്യവും ഇവിടെ വിശദീകരിക്കുന്നു. AI അധിഷ്ഠിത കണ്ടന്റ് പൈപ്പ്‌ലൈനുകൾ, ചാറ്റ് ഇന്റർഫേസുകൾ, സ്വാഭാവിക ഭാഷാ പ്രോസസ്സിംഗ് (NLP) അധിഷ്ഠിത സൊല്യൂഷനുകൾ എന്നിവയിൽ പ്രവർത്തിക്കുന്നവർക്ക് ഈ കോഴ്സ് ഏറെ പ്രയോജനകരമാണ്.

7. ക്രിയേറ്റ് ഇമേജ് ക്യാപ്ഷനിംഗ് മോഡൽസ് (ദൈർഘ്യം: 30 മിനിറ്റ്)

ചിത്രങ്ങൾക്ക് കൃത്യവും ആകർഷകവുമായ അടിക്കുറിപ്പുകൾ (ക്യാപ്ഷനുകൾ) നൽകാൻ AI മോഡലുകളെ എങ്ങനെ പരിശീലിപ്പിക്കാമെന്ന് ഈ 30 മിനിറ്റ് കോഴ്സ് പഠിപ്പിക്കുന്നു. മാധ്യമങ്ങൾ, വിദ്യാഭ്യാസം, പുസ്തക പ്രസാധനം, ഇ-കൊമേഴ്‌സ് തുടങ്ങിയ മേഖലകളിൽ പ്രവർത്തിക്കുന്നവർക്ക് ഈ കോഴ്സ് വളരെ ഉപകാരപ്പെടും. ചിത്രങ്ങളിലൂടെയുള്ള ആശയവിനിമയം കൂടുതൽ ഫലപ്രദമാക്കാൻ AI എങ്ങനെ ഉപയോഗിക്കാമെന്ന് ഇവിടെ മനസ്സിലാക്കാം.

8. ഇൻ്ട്രൊഡക്ഷൻ ടു വെർടെക്സ് AI സ്റ്റുഡിയോ (ദൈർഘ്യം: 2 മണിക്കൂർ)

വെർടെക്സ് AI സ്റ്റുഡിയോ ഉപയോഗിച്ച് ജനറേറ്റീവ് AI ആപ്ലിക്കേഷനുകൾ എങ്ങനെ നിർമ്മിക്കാമെന്ന് വിശദമായി പഠിപ്പിക്കുന്ന കോഴ്സാണിത്. പ്രോംപ്റ്റ് എഞ്ചിനീയറിംഗ്, മോഡൽ ട്യൂണിംഗ്, ആപ്ലിക്കേഷൻ ഡിപ്ലോയ്‌മെൻ്റ് എന്നിവയെല്ലാം ഈ 2 മണിക്കൂർ കോഴ്സിൽ ഉൾപ്പെടുന്നു. പ്രോഡക്ട് മാനേജർമാർ, ഇന്നവേഷൻ ലീഡ്‌സ്, സ്റ്റാർട്ടപ്പ് സ്ഥാപകർ എന്നിവർക്ക് തങ്ങളുടെ ആശയങ്ങൾ AI ആപ്ലിക്കേഷനുകളാക്കി മാറ്റാൻ ഈ കോഴ്സ് വളരെ പ്രയോജനകരമാകും.

Story Highlights : Anyone can learn AI: Google’s 8 free online AI courses