‘സാങ്കേതികമായ കാര്യങ്ങളാണ് ഇന്ന് നടന്നത്’; കന്യാസ്ത്രീകളുടെ അറസ്റ്റിൽ മലക്കം മറിഞ്ഞ് അനൂപ് ആന്റണി

ഛത്തീസ്ഗഢിലെ കന്യാസ്ത്രീകളുടെ അറസ്റ്റിൽ മലക്കം മറിഞ്ഞ് ബിജെപി നേതാവ് അനൂപ് ആന്റണി. കന്യാസ്ത്രീകളുടെ ജാമ്യാപേക്ഷയെ പ്രോസീക്യൂഷൻ എതിർത്തില്ലെന്നും സർക്കാർ പിന്തുണയ്ക്കുകയാണ് ചെയ്തതെന്നുമായിരുന്നു രാവിലെ അനൂപ് ആന്റണി പറഞ്ഞത്.എന്നാൽ വൈകുന്നേരമാകുമ്പോഴേയ്ക്കും നിലപാട് മാറി.കോടതിയിലെ ഛത്തീസ്ഗഡ് സർക്കാർ സ്വീകരിച്ച നിലപാടിനേക്കുറിച്ചുള്ള ചോദ്യത്തിൽ നിന്ന് ഒഴിഞ്ഞു മാറി.സാങ്കേതികമായ കാര്യങ്ങളാണ് ഇന്ന് നടന്നതെന്നായിരുന്നു മറുപടി.

അതേസമയം ഛത്തീസ്ഗഢിൽ മലയാളി കന്യാസ്ത്രീകൾ അറസ്റ്റിലായ സംഭവം സംഘപരിവാറിൽ വലിയ രീതിയിലുള്ള തർക്കങ്ങൾക്ക് വഴിതെളിച്ചിരിക്കുകയാണ്. പാർട്ടിയുടെ സംസ്ഥാന അധ്യക്ഷൻ കെ. രാജീവ് ചന്ദ്രശേഖറിനെ പരസ്യമായി വിമർശിച്ചുകൊണ്ട് ആർഎസ്എസ് നേതാക്കളും ബിജെപിയിലെ മറ്റ് പ്രമുഖരും രംഗത്തെത്തി.

ആർഎസ്എസ് നേതാവ് കെ. ഗോവിന്ദൻകുട്ടി രാജീവ് ചന്ദ്രശേഖറിന്റെ നിലപാടിനെ ചോദ്യം ചെയ്തുകൊണ്ട് ശക്തമായ വിമർശനമുയർത്തി. “ഛത്തീസ്ഗഢ് സർക്കാർ നിയമപരമായി പ്രവർത്തിക്കില്ലെന്നാണോ കേരളത്തിലെ ബിജെപി കരുതുന്നത്?” എന്ന് അദ്ദേഹം ചോദിച്ചു. കന്യാസ്ത്രീകളുടെ അറസ്റ്റിനെ ബിജെപി ന്യായീകരിക്കാൻ ശ്രമിക്കുന്നതിലുള്ള അതൃപ്തിയാണ് ഈ ചോദ്യത്തിലൂടെ അദ്ദേഹം വ്യക്തമാക്കിയത്. ഒരു ബിജെപി ഭരിക്കുന്ന സംസ്ഥാനത്ത് നടന്ന സംഭവത്തിൽ നിയമപരമായ നടപടികളെ പിന്തുണയ്ക്കുന്നതിന് പകരം ന്യായീകരണങ്ങൾ നൽകുന്നത് ശരിയല്ലെന്ന സൂചനയാണ് ഗോവിന്ദൻകുട്ടി നൽകുന്നത്.

മുൻ ഡിജിപി ടി.പി. സെൻകുമാർ, ഹിന്ദു ഐക്യവേദി മുഖ്യരക്ഷാധികാരി നേതാവ് കെ.പി. ശശികല എന്നിവരും രാജീവ് ചന്ദ്രശേഖറിനെതിരെ ഫേസ്ബുക്കിലൂടെ രംഗത്തെത്തി. ടി.പി. സെൻകുമാർ തന്റെ ഫേസ്ബുക്ക് പോസ്റ്റിൽ “ആകാശത്തു പറക്കുന്ന കുരുവിയെ കിട്ടും എന്ന വ്യാമോഹത്തിൽ കക്ഷത്തിൽ ഇരിക്കുന്ന പ്രാവിനെ കളയണോ?” എന്ന് കുറിച്ചു. ഇത് നിലവിൽ പാർട്ടിക്കുള്ള പിന്തുണയെ അവഗണിച്ച് പുതിയൊരു നേട്ടത്തിനുവേണ്ടി ശ്രമിക്കുന്നത് ബുദ്ധിമോശമാണെന്ന് പരോക്ഷമായി ഓർമ്മിപ്പിക്കുന്നു.

കെ.പി. ശശികലയുടെ പ്രതികരണം ഇങ്ങനെയായിരുന്നു “പറക്കുന്ന പക്ഷി മനോഹരമാണ്, അതിനെ പിടിക്കണം നല്ല ലക്ഷ്യമാണ്. ശരി തന്നെ, പക്ഷെ കയ്യിലുള്ളത് പറക്കാതെ നോക്കണം.” പുതിയ രാഷ്ട്രീയ ലക്ഷ്യങ്ങൾ നേടാൻ ശ്രമിക്കുമ്പോൾ നിലവിലുള്ള അടിത്തറയും പിന്തുണയും നഷ്ടപ്പെടാതിരിക്കാൻ ശ്രദ്ധിക്കണം എന്ന മുന്നറിയിപ്പ് കൂടിയാണിത് . ഈ ആഭ്യന്തര ഭിന്നത കേരളബിജെപി നേതൃത്വത്തിന് വലിയ തലവേദനയാണ് സൃഷ്ടിച്ചിരിക്കുന്നത്.

Story Highlights : BJP leader Anoop Antony reacts to the arrest of nuns