സംസ്ഥാനത്ത് മഴ കനക്കും; 6 ജില്ലകളിൽ ഇന്ന് ഓറഞ്ച് അലേർട്ട് പ്രഖ്യാപിച്ചു

സംസ്ഥാനത്ത് മഴ ശക്തമായി തുടരും. ആറ് ജില്ലകളിൽ ഇന്ന് ഓറഞ്ച് അലേർട്ട് പ്രഖ്യാപിച്ചു. മധ്യ, വടക്കൻ കേരളത്തിലാണ് മഴ ശക്തിപ്രാപിക്കുക. എറണാകുളം, തൃശ്ശൂർ, കോഴിക്കോട്, വയനാട്, കണ്ണൂർ കാസർഗോഡ് ജില്ലകളിലാണ് ഓറഞ്ച് അലേർട്ട് പ്രഖ്യാപിച്ചിരിക്കുന്നത്. പത്തനംതിട്ട, കോട്ടയം, ഇടുക്കി പാലക്കാട് മലപ്പുറം ജില്ലകളിൽ യെല്ലോ മുന്നറിയിപ്പും നൽകിയിട്ടുണ്ട്. നാളെ ഒൻപത് ജില്ലകളിൽ യെല്ലോ അലേർട്ട് മുന്നറിയിപ്പ് നൽകിയിട്ടുണ്ട്. എറണാകുളം, ഇടുക്കി, തൃശ്ശൂർ,പാലക്കാട്, മലപ്പുറം, കോഴിക്കോട്, വയനാട്,കണ്ണൂർ,കാസർഗോഡ് ജില്ലകളിലാണ് യെല്ലോ മുന്നറിയിപ്പ്.

അതേസമയം, കനത്ത മഴയിൽ കൊച്ചി നഗരത്തിൽ പലയിടങ്ങളിലും വെള്ളക്കെട്ട് രൂപപ്പെട്ടത് ആളുകളെ വലച്ചു. കോഴിക്കോട് കാവിലുംപാറ, മരുതോംഗര മേഖലകളിൽ ശക്തമായ മഴ തുടരുകയാണ്. ആലുവ പുളിഞ്ചോട് ഭാഗങ്ങളിൽ ഇരുപതോളം കടകളിലും പത്തോളം വീടുകളിലും വെള്ളം കയറി. ശക്തമായ മഴ തുടരുന്നതിനാൽ കൂടുതൽ സ്ഥലങ്ങളിലേക്കും വെള്ളക്കെട്ട് വ്യാപിക്കാനാണ് സാധ്യത. ഈരാറ്റുപേട്ട വടക്കേക്കരയിൽ പൊലീസ് ക്വാർട്ടേഴ്‌സിനു സമീപം പാർക്ക് ചെയ്തിരുന്ന വാഹനങ്ങൾക്ക് മുകളിലേക്ക് മരം വീണു. നാലു കാറികൾക്കും ഒരു ബൈക്കിനും മുകളിലേക്കാണ് മരം വീണത്.

ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്ററിൽ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്.

Story Highlights : Orange alert in 6 districts today