ഗോരഖ്പൂരിൽ വീണ്ടും ശിശു മരണം; 24 മണിക്കൂറിനിടെ മരിച്ചത് 16 കുട്ടികൾ

ഗോരഖ്പൂരിലെ ശിശുമരണം തുടർക്കഥയാകുന്നു. കഴിഞ്ഞ 24 മണിക്കൂറിനിടെ ബാബാ രാഘവ് ദാസ് (ബി.ആർ.ഡി) മെഡിക്കൽ കോളജിൽ 16 കുട്ടികൾ മരിച്ചതായാണ് റിപ്പോർട്ട്.

പത്തു നവജാത ശിശുക്കളും മരിച്ചവരിൽ ഉൾപെടും. എൻ.ഐ.സി.യുവിൽ പ്രവേശിപ്പിച്ചവരായിരുന്നു ഇവർ. ആറുപേർ ഡയേറിയ ബാധിച്ചാണ് മരിച്ചതെന്നും റിപ്പോർട്ടിലുണ്ട്.

ആഗസ്റ്റിലും ആശുപത്രിയിൽ കുട്ടികൾ കൂട്ടമായി മരിച്ചിരുന്നു. മൂന്നു ദിവസത്തിനിടെ 72 കുട്ടികളാണ് അന്ന് മരിച്ചത്. ഇത് രാജ്യമെങ്ങും കനത്ത പ്രതിഷേധത്തിനിടയാക്കിയിരുന്നു. ഓക്‌സിജൻ വിതരണത്തിലെ അപാകതയായിരുന്നു മരണ കാരണം. എന്നാൽ ഇത്തവണ ആശുപത്രിയുടെ ഭാഗത്തു നിന്ന് ഒരു വീഴ്ചയും ഉണ്ടായിട്ടില്ലെന്നാണ് അധികൃതർ പറയുന്നത്.

gorakhpur infant death continues