കനത്ത മൂടൽമഞ്ഞ്; മുപ്പതോളം വാഹനങ്ങൾ കൂട്ടിയിടിച്ചു; 18 മരണം

കനത്ത മൂടൽമഞ്ഞിനെ തുടർന്ന് ചൈനയിലെ എക്‌സ്പ്രസ് വേയിൽ മുപ്പതോളം വാഹനങ്ങൾ കൂട്ടിയിടിച്ചു. പതിനെട്ട് പേർ മരിച്ചു. സംഭവത്തിൽ 21 പേർക്ക് പരിക്കേറ്റിറ്റുണ്ട്. ഇവരെ സമീപത്തെ ആശുപത്രിയിൽ പ്രവേശിപ്പിച്ചു.

കിഴക്കൻ ചൈനയിലെ അൻഹുയി പ്രവിശ്യയിലെ ഫുയാങ് നഗരത്തിൽ ബുധനാഴ്ച പുലർച്ചെ ആയിരുന്നു അപകടം. അപകടത്തിൽപ്പെട്ട വാഹനങ്ങൾക്ക് തീ പിടിക്കുകയും ചെയ്തു. ഇരുപതോളം അഗ്‌നിശമനസേനാ വാഹനങ്ങളെയാണ് സംഭവസ്ഥലത്ത് നിയോഗിച്ചത്. മൂന്നുമണിക്കൂറിനു ശേഷമാണ് തീ പൂർണമായും അണയ്ക്കാൻ സാധിച്ചത്.

കിലോമീറ്ററുകൾ നീണ്ട ഗതാഗതക്കുരുക്കിനും അപകടം വഴിവച്ചു. അപകടത്തെ കുറിച്ച് അന്വേഷണം ആരംഭിച്ചിട്ടുണ്ട്.