യുവാക്കള്‍ ആ സുന്ദരിയെ നോക്കി കണ്ണിറുക്കി കഴിഞ്ഞു; ഇതാണ് ആ ‘അഡാറ്’ പാട്ട്

ഒരു അഡാറ് ലവ് എന്ന ഒമര്‍ ലുലു ചിത്രത്തിലെ ‘മാണിക്യ മലരായ പൂവി…’ എന്ന ഗാനം കേരളത്തിലെ യുവാക്കളെ വല്ലാതങ്ങ് പിടികൂടി കഴിഞ്ഞു. കേട്ടിട്ടും കേട്ടിട്ടും മതിയാകാതെ എല്ലാവരും ആ പാട്ടിന് പിന്നാലെയാണ് ഇപ്പോള്‍. മലബാറിന്റെ തനിമയില്‍ ചേര്‍ന്നുകിടക്കുന്ന ഈ ഗാനത്തിലെ വരികള്‍ ഒരൊറ്റ ദിവസംകൊണ്ട് ഹിറ്റ് ചാര്‍ട്ടില്‍ ഇടംപിടിച്ചു കഴിഞ്ഞു. ഒമര്‍ ലുലു സംവിധാനം നിര്‍വഹിച്ചിരിക്കുന്ന ചിത്രത്തില്‍ ഷാന്‍ റഹ്മാന്‍ സംഗീത സംവിധാനം നിര്‍വഹിച്ച ഗാനമാണ് ഇന്നലെ റിലീസ് ചെയ്തത്. മാപ്പിളപാട്ടിന്റെ ശൈലിയോട് സാമ്യം പുലര്‍ത്തുന്ന ഈ ഗാനം ആലപിച്ചിരിക്കുന്നത് വിനീത് ശ്രീനിവാസനാണ്. ഏതാനും വര്‍ഷങ്ങള്‍ക്കു മുന്‍പ് പി.എം.എ ജബ്ബാര്‍ രചിച്ച് തലശേരി കെ.റഫീഖ് സംഗീത സംവിധാനം നിര്‍വഹിച്ച ഗാനം ഷാന്‍ റഹ്മാന്‍ പുനരവതരിപ്പിച്ചിരിക്കുകയാണ് ചിത്രത്തില്‍. ഗാനരംഗത്ത് സിനിമയിലെ പുതുമുഖങ്ങളുടെ പ്രകടനം ഏറെ ശ്രദ്ധിക്കപ്പെട്ടുകഴിഞ്ഞിരിക്കുകയാണ്.