സർക്കാർ ഭൂമി സ്വകാര്യവ്യക്തിക്ക് കൈമാറി; സബ് കളക്ടർ ദിവ്യാ എസ് അയ്യരുടെ നടപടി വിവാദത്തിൽ

റവന്യൂ വകുപ്പ് ഏറ്റെടുത്ത 27 സെന്റ് കയ്യേറ്റ ഭൂമി സ്വകാര്യ വ്യക്തിക്ക് വിട്ടുകൊടുത്ത തിരുവനന്തപുരം സബ് കലക്ടർ ദിവ്യ എസ് അയ്യരുടെ നടപടി വിവാദത്തിൽ. വർക്കല വില്ലേജിലെ ഇലകമൺ പഞ്ചായത്തിലുള്ള റോഡ് സൈഡിലുള്ള ഭൂമിയാണ് വിട്ടുകൊടുത്തത്.

വർക്കല വില്ലിക്കടവിൽ സംസ്ഥാന പാതയോരത്തെ 27 സെന്റ് റോഡ് പുറമ്പോക്കു സ്വകാര്യ വ്യക്തി അനധികൃതമായി കൈവശം വച്ചിരിക്കുന്നതായി കണ്ടെത്തി വർക്കല തഹസീൽദാർ കഴിഞ്ഞ ജൂലൈ 19നാണ് ഏറ്റെടുത്തത്. നടപടിക്കെതിരെ സ്വകാര്യ വ്യക്തി നൽകിയ ഹർജിയിൽ ഉചിതമായ തീരുമാനമെടുക്കാൻ സബ് കലക്ടറോടു ഹൈക്കോടതി നിർദേശിച്ചിരുന്നു. ഇതേത്തുടർന്നാണു ഭൂമി സ്വകാര്യ വ്യക്തിക്കു വിട്ടുകൊടുത്ത് ദിവ്യ എസ്. അയ്യർ ഉത്തരവിറക്കിയത്.

അയിരൂർ പോലീസ് സ്റ്റേഷൻ നിർമ്മിക്കാൻ സർക്കാർ തീരുമാനിച്ച സ്ഥലമായിരുന്നു ഇത്.