പ്രളയക്കെടുതി; പട്ടികജാതി, പട്ടികവർഗ്ഗ കുടുംബങ്ങൾക്ക് പ്രത്യേക ധനസഹായം

പ്രളയം സൃഷ്ടിച്ച ആഘാതത്തിൽ കഷ്ടപ്പെടുന്ന ആദിവാസി, പട്ടികജാതി കുടുംബങ്ങൾക്ക് പ്രത്യേക സാമ്പത്തിക സഹായം നൽകാൻ സർക്കാർ തീരുമാനിച്ചു. പ്രളയത്തെ തുടർന്ന് മേഖലയിൽ ഉണ്ടായ ദുർഘടാവസ്ഥയും പ്രത്യേക സാഹചര്യവും കണക്കിലെടുത്താണ് പ്രത്യേക ധനസഹായത്തിന് പട്ടികജാതി, പട്ടികവർഗ്ഗ വകുപ്പുകൾ തീരുമാനിച്ചത്. ആദിവാസി കുടുംബങ്ങൾക്ക് 10,000 രൂപയും പട്ടികജാതി കുടുംബങ്ങൾക്ക് 5000 രൂപയും നൽകും. പ്രളയബാധിതർക്കായി സർക്കാർ പ്രഖ്യാപിച്ച സഹായത്തിന് പുറമെയാണ് ഈ സഹായം. പട്ടികജാതി, പട്ടികവർഗ്ഗ വികസന മന്ത്രിയുടെ ഓഫീസും തിരുവോണ ദിവസം പതിവ് പോലെ പ്രവർത്തിക്കുകയും മന്ത്രി എ കെ ബാലൻ ഓഫീസിൽ എത്തുകയും ചെയ്തു.