‘മോഹന്ലാലിന്റെ കണ്ണുകളില് വരെ അഭിനയം തുളുമ്പിയിട്ടുണ്ട്’; ഒടിയനെ കുറിച്ച് മന്ത്രി ജി. സുധാകരന്
മോഹന്ലാല് നായകനായ ഒടിയന് എന്ന ചിത്രത്തെ അഭിനന്ദിച്ച് മന്ത്രി ജി. സുധാകരന്. ഒടിയനില് മോഹന്ലാലിന്റെ കണ്ണുകളില് വരെ അഭിനയം തുളുമ്പിയിട്ടുണ്ട് എന്ന് ജി. സുധാകരന് പറയുന്നു. ചിത്രത്തിനെതിരെ നിരവധി കുപ്രചരണ വാര്ത്തകള് കേട്ടെന്നും അതിനാല് തന്നെ സിനിമ ഒന്നു കാണണമെന്ന് തോന്നിയെന്നും മന്ത്രി ഫേസ്ബുക്ക് പോസ്റ്റില് കുറിച്ചു. സിനിമ തനിക്ക് വളരെ ഇഷ്ടപ്പെട്ടു എന്നും മന്ത്രി പറയുന്നു.
ജി. സുധാകരന്റെ ഫേസ്ബുക്ക് പോസ്റ്റിന്റെ പൂര്ണ്ണരൂപം വായിക്കാം:
ഡിസംബർ 14 ന്റെ കേരള ഹർത്താലിനെ അതീജിവിച്ചാണ് മലയാളി പ്രേക്ഷകർ കാത്തിരുന്ന ഒടിയന് എന്ന സിനിമ പ്രേക്ഷകരുടെ മുന്നില് എത്തിയത്. പക്ഷേ പെട്ടെന്ന് തന്നെ ചിത്രത്തിന് എതിരെ കുപ്രചരണ വാർത്തകള് കേട്ടു. അതുകൊണ്ട് സിനിമ ഒന്ന് കാണണമെന്ന് തോന്നി. ചിത്രം എനിക്ക് വളരെ ഇഷ്ടപ്പെട്ടു.
കെ.ഹരികൃഷ്ണൻ വ്യത്യസ്തമായ കഥയൊരുക്കി വി.എ.ശ്രീകുമാർ മേനോൻ അതിമനോഹരമായി സംവിധാനം ചെയ്ത്, അഭിനയമികവും സ്വാഭാവിക ശൈലിയും കൊണ്ട് മോഹന്ലാലും മഞ്ചുവാരിയരും പ്രകാശ് രാജും ഉള്പ്പെടെയുള്ള കലാകാരന്മാർ അതിമനോഹരമാക്കിയിട്ടുള്ള മികച്ച ചിത്രം. എം.ജയചന്ദ്രന്റെ മികച്ച സംഗീതവും, പ്രഭാവർമ്മയുടെ ഗാനവും, ഷാജി കുമാറിന്റെ ഛായാഗ്രഹണവും ചിത്രത്തെ ആസ്വാദ്യകരമാക്കിയിട്ടുണ്ട്.
ഒടിയൻ മാണിക്യൻ എന്ന കഥാപാത്രത്തിന്റെ യൗവ്വനവും വാർദ്ധക്യവും ചിത്രത്തിൽ അവതരിപ്പിക്കുന്നതില് മോഹന്ലാല് നല്ല ശാരീരിക വഴക്കം പ്രകടിപ്പിച്ചിട്ടുണ്ട്. ഈ സിനിമയില് മോഹന്ലാലിന്റെ കണ്ണുകളില് വരെ അഭിനയം തുളുമ്പിയിട്ടുണ്ട് എന്ന് മറുചിന്തയില്ലാതെ വിശേഷിപ്പിക്കാം. മഞ്ജുവാരിയരുടെതും തുല്യതയില്ലാത്ത അഭിനയമികവ് തന്നെ. സിനിമയിലാകെ വളരെ സന്ദർഭോചിതമായി സംഭാഷണം ഉള്ക്കൊള്ളിക്കാന് കഴിഞ്ഞത് പ്രേക്ഷകരെ ചിന്തിപ്പിക്കുന്നുണ്ട്. പ്രേക്ഷകരെ ആദ്യാവസാനം പിടിച്ചിരുത്തും വിധം ഭൂതകാലത്തെയും വർത്തമാനകാലത്തെയും സമചിത്തമായി സമ്മേളിപ്പിച്ച് കൊണ്ടാണ് കഥനീങ്ങുന്നത്. മൂല്യബോധമുള്ള സിനിമയാണ്.
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here