സിബിഐ ഇടക്കാല ഡയറക്ടറുടെ നിയമനം: മൂന്നാമത്തെ ജഡ്ജിയും പിന്മാറി

സിബിഐ ഇടക്കാല ഡയറക്ടർ നാ​ഗേശ്വര റാവുവിന്റെ നിയമനം ചോദ്യം ചെയ്ത് നൽകിയ ഹർജികൾ പ​രി​ഗണിക്കുന്നതിൽ നിന്നും മൂന്നാമത്തെ ജഡ്ജിയും പിന്മാറി. ജസ്റ്റിസ് എൻ വി രമണയാണ് കേസിൽ നിന്നും പിന്മാറിയത്. എൻ വി രമണ അധ്യക്ഷനായ ബെഞ്ച് ഇന്ന് കേസ് പരി​ഗണിക്കുമെന്നാണ് പ്രതീക്ഷിച്ചിരുന്നതെങ്കിലും അവസാന നിമിഷം അദ്ദേഹം പിന്മാറുകയായിരുന്നു.

നേരത്തേ ചീഫ് ജസ്റ്റിസ് രഞ്ജൻ ​ഗോ​ഗൊയ്, ജസ്റ്റിസ് എ കെ സിക്രി എന്നിവർ കേസ് പരി​ഗണിക്കുന്നതിൽ നിന്നും പിന്മാറിയിരുന്നു. അലോക് വർമയുടെ കേസ് പരി​ഗണിച്ച് അദ്ദേഹത്തെ തിരിച്ച് സിബിഐയുടെ തലപ്പത്തേക്ക് എത്തിക്കാൻ ഉത്തരവിട്ടതിനാലാണ് രഞ്ജൻ ​ഗോ​ഗൊയ് കേസിൽ നിന്നും പിന്മാറിയത്. ജനുവരി 21നായിരുന്നു ചീഫ് ജസ്റ്റിസിന്റെ പിന്മാറ്റം.

തൊട്ടു പിന്നാലെ ജനുവരി 24 ന് സിക്രിയും കേസിൽ നിന്നും പിന്മാറി. തുടർന്നാണ് കേസ് പരി​ഗണിക്കാൻ ജസ്റ്റിസ് രമണ എത്തുന്നത്. മൂന്നാമത്തെ ജഡ്ജിയും പിന്മാറിയതോടെ നാ​ഗേശ്വര റാവുവിന്റെ നിയമനം ചോദ്യം ചെയ്തുള്ള ഹർജി പ്രതിസന്ധിയിലായിരിക്കുകയാണ്. ഇനി കേസ് ആര് പരി​ഗണിക്കുമെന്ന കാര്യം ചീഫ് ജസ്റ്റിസ് രഞ്ജൻ ​ഗോ​ഗൊയ് ആണ് പരി​ഗണിക്കുക.

നാ​ഗേശ്വർ റാവുവിന്റെ നിയമനത്തെ ചോദ്യം ചെയ്ത് എൻജിഒ സംഘടനയായ കോമൺ കോസാണ് ഹർജി ഫയൽ ചെയ്തത്.