കനത്ത മഴയ്ക്കും കാറ്റിനും സാധ്യത; കേരളത്തിലെ നാല് ജില്ലകളിൽ യെല്ലോ അലേർട്ട്

കേരളത്തിൽ കനത്ത കാറ്റിനും മഴയ്ക്കും സാധ്യത. ഇതേ തുടർന്ന് തിങ്കളാഴ്ച്ച സംസ്ഥാനത്തെ നാല് ജില്ലകളിൽ യെല്ലോ അലേർട്ട് പ്രഖ്യാപിച്ചു. എറണാകുളം, തൃശൂർ, ഇടുക്കി, മലപ്പുറം എന്നീ ജില്ലകളിലാണ് യെല്ലോ അലേർട്ട്.

തിങ്കൾ, ചൊവ്വ, ബുധൻ ദിവസങ്ങളിൽ കേരളത്തിലും കർണാടകത്തിലും ശക്തമായ കാറ്റിനും മഴയ്ക്കും സാധ്യതയുണ്ട്. വ്യാഴാഴ്ച രാവിലെയാണ് ശ്രീലങ്കയുടെ തെക്കുകിഴക്കായി ന്യൂനമർദം രൂപംകൊണ്ടത്. ഇത് ശക്തിപ്രാപിച്ച് 48 മണിക്കൂറിനുള്ളിൽ ചുഴലിക്കാറ്റായി രൂപപ്പെടുമെന്നാണ് പ്രവചനം.

Read Also : തീരദേശത്ത് ഒരു മാസത്തെ സൗജന്യ റേഷൻ നൽകാൻ മത്രിസഭ തീരുമാനം

ഞായറാഴ്ച്ച പുലർച്ചെയോടെ ന്യൂനമർദ്ദത്തിന്റെ ഫലമായി കേരളാ തീരത്തും കന്യാകുമാരിയിലും മണിക്കൂറിൽ 30 മുതൽ 40 കിമി വരെ വേഗത്തിൽ കാറ്റ് വീശും. കേരളത്തിൽ മഴയ്ക്ക് സാധ്യതയുണ്ട്. തിങ്കളാഴ്ച്ച കാറ്റിന്റെ വേഗം 70 കിലോമീറ്റർ വരെയാകുമെന്നാണ് പ്രവചനം. സംസ്ഥാനത്തെ ജില്ലകളിൽ ഒറ്റപ്പെട്ട മഴയ്ക്കും സാധ്യതയുണ്ട്.

ചൊവ്വാഴ്ച്ചയോടെ ന്യൂനമർദ്ദം തമിഴ്‌നാട് തീരത്തേക്കെത്തും. കേരളത്തിൽ ചൊവ്വാഴ്ച്ചയും ശക്തമായ മഴയ്ക്ക് സാധ്യതയുണ്ട്.