‘പരിപാടിക്ക് വിളിച്ച എന്നോട് കൂടെ കിടക്കാമോ എന്നും, നിന്റെ അമ്മയെ കൂടി വേണമെന്നും പറഞ്ഞ വിനായകനോട് യാതൊരു ബഹുമാനമില്ല’ : മൃദുലദേവി ശശിധരൻ

പരിപാടിക്ക് വിളിച്ച വിനായകൻ തന്നോട് മോശമായി പെരുമാറിയിട്ടുണ്ടെന്ന് ദളിത് ആക്ടിവിസ്റ്റ് മൃദുലദേവി ശശിധരൻ. പരിപാടിക്ക് വിളിച്ച എന്നോട് കൂടെ കിടക്കാമോ എന്നും, നിന്റെ അമ്മയെ കൂടി വേണമെന്നും പറഞ്ഞ വിനായകനോട് യാതൊരു ബഹുമാനമില്ലെന്നും എന്നാൽ അദ്ദേഹത്തെ ജാതീയമായി അധിക്ഷേപിച്ചതിനെ അപലപിക്കുന്നുവെന്നും മൃദുല പറഞ്ഞു.

തന്റെ രാഷ്ട്രീയ നിലപാട് വ്യക്തമാക്കിയ നടൻ വിനായകനെതിരായ സൈബർ ആക്രമണം രൂക്ഷമാവുന്നതിനിടെ നിരവധി പേരാണ് വിനായകനെ പിന്തുണച്ച് രംഗത്തെത്തിയിരിക്കുന്നത്. ഇതിനിടെയാണ് ദളിത് ആക്ടിവിസ്റ്റ് മൃദുല ശശിധരന്റെ ഫേസ്ബുക്ക് പോസ്റ്റ് എത്തിയിരിക്കുന്നത്.

പോസ്റ്റിൽ പറയുന്നതിങ്ങനെ :

‘നടിയ്‌ക്കൊപ്പം നില കൊണ്ട വിനായകനോട് ബഹുമാനമായിരുന്നു.എന്നാൽ യഥാർത്ഥ ജീവിതത്തിൽ അദ്ദേഹം സ്ത്രീ വിരുദ്ധത കാണിച്ചത് ബോധ്യപ്പെട്ടിട്ടുണ്ട്. പരിപാടിക്ക് വിളിച്ച എന്നോട് കൂടെ കിടക്കാമോ എന്നും, നിന്റെ അമ്മയെ കൂടി എനിക്ക് വേണം എന്നും പറഞ്ഞ വിനായകനോട് യാതൊരു ബഹുമാനവുമില്ല. കാൾ റെക്കോർഡർ സൂക്ഷിച്ചിട്ടുണ്ട് തൊട്ടപ്പൻ കാണും. കാമ്പയിനിൽ സജീവമായുണ്ടാവും. അദ്ദേഹത്തെ ജാതീയമായി അധിക്ഷേപിച്ചതിനെ അപലപിക്കുന്നു. അത്തരം ജാതി അധിക്ഷേപങ്ങൾക്കെതിരെ എപ്പോഴും നില കൊള്ളൂന്നതിനാൽ വിനായകൻ ജാതീയമായോ, വംശീയമായോ അധിക്ഷേപിക്കപ്പെടുന്നത് ശക്തമായി എതിർക്കുന്നു. സ്ത്രീ ശരീരം ഉപഭോഗവസ്തുവായി കണക്കാക്കിയ വിനായകനൊപ്പമല്ല ജാതീയമായി ആക്രമിക്കപ്പെട്ട വിനായകനൊപ്പം മാത്രം. ഈ വിഷയത്തിൽ കൂടുതൽ ഒന്നും പറയാനില്ലാത്തതിനാൽ മെസ്സഞ്ചർ, ഫോൺ എന്നിവയിൽ കൂടി കൂടുതൽ അന്വേഷണങ്ങൾ ഉണ്ടാകാതിരിക്കുമല്ലോ.’

തെരഞ്ഞെടപ്പ് ഫലപ്രഖ്യാപനത്തിന് പിന്നാലെ ഒരു മാധ്യമത്തിന് നൽകിയ അഭിമുഖത്തിലാണ് വിനായകൻ രാഷ്ട്രീയ നിലപാട് വ്യക്തമാക്കിയത്. കേരളത്തിൽ എന്താണ് സംഭവിച്ചതെന്ന് അറിയില്ലെന്നും കേരളത്തിലെ ജനങ്ങൾ ഇതേക്കുറിച്ച് തീർച്ചയായും ചിന്തിക്കണമെന്നും വിനായകൻ അഭിമുഖത്തിൽ പറഞ്ഞിരുന്നു. ബിജെപിയുടേയും സംഘപരിവാറിന്റേയും അജണ്ട കേരളത്തിലെ ജനങ്ങൾ തള്ളിക്കളഞ്ഞതിൽ അദ്ദേഹം സംതൃപ്തി പ്രകടിപ്പിച്ചിരുന്നു. ബിജെപിക്കും ആർഎസ്എസിനും കേരളത്തിൽ ഒന്നും ചെയ്യാൻ കഴിയില്ലെന്നും നമ്മളൊക്കെ മിടുക്കന്മാരാണെന്നും അതാണ് തെരഞ്ഞെടുപ്പിൽ കണ്ടതെന്നും വിനായകൻ പറഞ്ഞു. ഒരു രാഷ്ട്രീയക്കാരനായി കളത്തിൽ ഇറങ്ങില്ല, പക്ഷേ എപ്പോഴും കമ്മ്യൂണിസ്റ്റായിരിക്കുമെന്നും അദ്ദേഹം നിലപാട് വ്യക്തമാക്കിയിരുന്നു.

ഫേസ്ബുക്കിൽ പോസ്റ്റു ചെയ്ത അഭിമുഖ വീഡിയോക്ക് താഴെയാണ് മോശം കമന്റുകൾ നിറഞ്ഞിരിക്കുന്നത്. ‘രാഷ്ട്രീയ നിലപാട് നോക്കാതെ നിന്റെ സിനിമകൾ കണ്ടു, രാഷ്ട്രീയ നിലപാട് നോക്കി അതങ്ങ് നിർത്തി’ എന്നായിരുന്നു ഒരാളുടെ കമന്റ്. ‘നീഗ്രോയുടെ മുഖം പോലെയുള്ളവൻ’ എന്ന് പറഞ്ഞ് ആക്ഷേപിച്ചവരുണ്ട്. ‘ഇനി മുതൽ നീ വിനായകൻ അല്ല, വിനായകൻ ഖാൻ ആണ്. ജയ് ഗോ മാതാ’ എന്നായിരുന്നു മറ്റൊരാളുടെ കമന്റ്. നടനെതിരെ തെറിവിളികളും ഉയർന്നിട്ടുണ്ട്