എക്‌സൈസ് കസ്റ്റഡി മരണം; വകുപ്പുതല അന്വേഷണം പ്രഖ്യാപിച്ചു

പാവറട്ടിയിൽ എക്‌സൈസ് കസ്റ്റഡിയിലെടുത്ത മലപ്പുറം സ്വദേശി രഞ്ജിത് മരണപ്പെട്ട സംഭവത്തിൽ വകുപ്പുതല അന്വേഷണം പ്രഖ്യാപിച്ചു. അഡീഷണൽ എക്‌സൈസ് കമ്മീഷണർ സാം ക്രിസ്റ്റി ഡാനിയേലിനാണ് അന്വേഷണ ചുമതല. സംഭവത്തിൽ ഉദ്യോഗസ്ഥരുടെ ഭാഗത്ത് നിന്ന് വീഴ്ചയുണ്ടായിട്ടുണ്ടോ എന്ന് അന്വേഷിക്കും.

രഞ്ജിത് മരിച്ച സംഭവത്തിൽ കസ്റ്റഡി മർദനം നടന്നതായാണ് പോസ്റ്റുമോർട്ടം കണ്ടെത്തൽ. രഞ്ജിത്തിന്റെ തലക്ക് കാര്യമായ മർദനമേറ്റിട്ടുണ്ടെന്ന് പോസ്റ്റുമോർട്ടം റിപ്പോർട്ടിൽ പറയുന്നു. ശരീരത്തിൽ പന്ത്രണ്ടോളം ക്ഷതങ്ങൾ കണ്ടെത്തി. ആന്തരിക രക്തസ്രാവവും മരണത്തിലേക്ക് നയിച്ചു. പോസ്റ്റുമോർട്ടത്തിലെ പ്രാഥമിക കണ്ടെത്തലുകൾ ചൂണ്ടിക്കാണിച്ച് മെഡിക്കൽ സംഘം പാവറട്ടി സിഐക്ക് പ്രാഥമിക റിപ്പോർട്ട് സമർപ്പിച്ചിട്ടുണ്ട്.

അതേസമയം, രഞ്ജിത്തിന്റെ പോസ്റ്റ്‌മോർട്ടം റിപ്പോർട്ട് ഞെട്ടിക്കുന്നതാണെന്ന് കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ പറഞ്ഞു. അരുംകൊലയാണിതെന്ന് വ്യക്തമായ സൂചന റിപ്പോർട്ടിലുണ്ടെന്നും മുല്ലപ്പള്ളി രാമചന്ദ്രൻ പറഞ്ഞു. അതീവ ഗൗരവത്തോടെ ഈ റിപ്പോർട്ട് സർക്കാർ കാണണമെന്നും കുറ്റക്കാർക്കെതിരേ കർശന നടപടി സ്വീകരിക്കണമെന്നും മുല്ലപ്പള്ളി ആവശ്യപ്പെട്ടു.