വാളയാർ കേസിൽ കോടതി വിട്ടയച്ച പ്രതിക്ക് നേരെ ആക്രമണം

വാളയാർ കേസിൽ കോടതി വിട്ടയച്ച പ്രതിക്ക് മർദനം. മധുവിനാണ് മർദനമേറ്റത്. അട്ടപ്പള്ളത്തുവച്ചാണ് ആക്രമണമുണ്ടായത്. ഇയാളെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചു. മർദനമേറ്റ് റോഡരുകിൽ കിടന്ന മധുവിനെ പൊലീസാണ് ആശുപത്രിയിലെത്തിച്ചത്.

മധുവിന് നാട്ടുകാരിൽ നിന്നാണ് മർദനമേറ്റതെന്നാണ് പൊലീസ് പറയുന്നത്. മധുവിന് കാര്യമായി മർദനമേറ്റിട്ടുണ്ട്. ബന്ധുവിനൊപ്പം വരുമ്പോഴായിരുന്നു ആക്രമണമുണ്ടായത്. മധുവിനെ ഒരു സംഘം ആളുകൾ മർദിക്കുകയായിരുന്നുവെന്ന് നാട്ടുകാർ പറഞ്ഞു. സംഭവത്തിൽ പൊലീസ് അന്വേഷണം ആരംഭിച്ചു.

വാളയാറിൽ സഹോദരിമാർ ദുരൂഹ സാഹചര്യത്തിൽ മരണപ്പെട്ട കേസിൽ മധു ഉൾപ്പെടെ മൂന്ന് പേരെയാണ് തെളിവുകളുടെ അഭാവത്തിൽ വെറുതെ വിട്ടത്. പാലക്കാട് പോക്‌സോ കോടതിയുടേതായിരുന്നു നടപടി. പ്രോസിക്യൂഷനെതിരെ കടുത്ത വിമർശനമായിരുന്നു കോടതി ഉന്നയിച്ചത്. പ്രതികളെ വെറുതെവിട്ട നടപടി വ്യാപക വിമർശനത്തിനിടയാക്കിയിരുന്നു.

വാളയാറിൽ 2017 ജനുവരിയിലും മാർച്ചിലുമായാണ് പതിമൂന്നും ഒൻപതും വയസ് പ്രായമുള്ള പെൺകുട്ടികൾ ദുരൂഹ സാഹചര്യത്തിൽ മരിക്കുന്നത്. രണ്ട് പെൺകുട്ടികളും ലൈംഗിക ചൂഷണത്തിന് ഇരയായിരുന്നതായി പോസ്റ്റുമോർട്ടം റിപ്പോർട്ടിൽ ഉണ്ടായിരുന്നു. അഞ്ചു പ്രതികളുണ്ടായിരുന്ന കേസിൽ പോക്സോ, ബലാത്സംഗം, ആത്മഹത്യാപ്രേരണ തുടങ്ങി ഒട്ടേറെ വകുപ്പുകൾ ചുമത്തിയിരുന്നെങ്കിലും തെളിവ് ശേഖരണത്തിൽ പാളിച്ചയുണ്ടായി. ആകെ 52 സാക്ഷികളെ വിസ്തരിച്ചെങ്കിലും മിക്കവരും കൂറുമാറിയിരുന്നു.

കുറ്റകൃത്യത്തിലേക്ക് നയിക്കുന്ന തെളിവ് കണ്ടെത്താൻ അന്വേഷണസംഘത്തിനായില്ല. രഹസ്യ വിചാരണാവേളയിൽപ്പോലും ശക്തമായ സാക്ഷിമൊഴികളും അന്വേഷണ സംഘത്തിന് കിട്ടിയിരുന്നില്ല. സംഭവം നടന്ന് രണ്ട് വർഷമായിട്ടും വിചാരണ ആരംഭിക്കാത്തതും വിമർശനത്തിന് ഇടയാക്കിയിരുന്നു.