മരടിലെ ഫ്‌ളാറ്റ് പൊളിക്കല്‍ നടപടി മൂന്ന് ദിവസത്തേക്ക് നിര്‍ത്തിവച്ചു

മരടിലെ ഫ്‌ളാറ്റ് സമുച്ചയങ്ങള്‍ പൊളിക്കുന്ന നടപടി മൂന്ന് ദിവസത്തേക്ക് നിര്‍ത്തിവച്ചു. കൗണ്‍സിലര്‍മാരുടെയും പരിസരവാസികളുടെയും പ്രതിഷേധത്തെ തുടര്‍ന്ന് സബ് കളക്ടറുമായി നടത്തിയ ചര്‍ച്ചയിലാണ് തീരുമാനം. അതേ സമയം മരടിലെ പ്രദേശവാസികളുടെ ആശങ്ക പരിഹരിക്കാനായി കളക്ടറുടെ നേതൃത്വത്തില്‍ മറ്റന്നാള്‍ യോഗം ചേരും.

ഇന്‍ഷുറന്‍സ് പരിരക്ഷ അടക്കമുള്ള കാര്യങ്ങള്‍ യോഗത്തില്‍ ചര്‍ച്ച ചെയ്യും. പ്രശ്‌നം പരിഹരിക്കാം എന്ന ഉറപ്പിന്മേല്‍ കൗണ്‍സിലര്‍മാര്‍ പ്രതിഷേധം അവസാനിപ്പിച്ചു. മരടിലെ ഫ്‌ളാറ്റുകള്‍ പൊളിക്കുന്നത് അടിയന്തിരമായി നിര്‍ത്തിവയ്ക്കാന്‍ സുപ്രീം കോടതിയില്‍ ഹര്‍ജി നല്‍കാന്‍ മരട് നഗരസഭാ കൗണ്‍സിലില്‍ തീരുമാനമായിട്ടുണ്ട്. വീടുകള്‍ക്കുണ്ടാവുന്ന വിള്ളലുകളും നാശനഷ്ടവും കണക്കിലെടുത്താണ് നടപടി.