പൗരത്വ നിയമ ഭേദഗതി; കലൂരിൽ നിന്ന് പീപ്പിൾസ് ലോങ് മാർച്ച് ആരംഭിച്ചു

പൗരത്വ നിയമ ഭേദഗതിക്കെതിരെ ഫേസ്ബുക്ക് കൂട്ടായ്മയുടെ നേതൃത്വത്തിൽ പീപ്പിൾസ് ലോങ് മാർച്ച് നടത്തുന്നു. കലൂർ ജവഹർലാൽ നെഹ്‌റു സറ്റേഡിയത്തിൽ നിന്ന് ആരംഭിക്കുന്ന റാലി കൊച്ചി ഷിപ്പ് യാർഡിന് മുന്നിൽ സമാപിക്കും. സിനിമ സാംസ്‌കാരിക രംഗത്തെ പ്രമുഖരും സാമൂഹിക പ്രവർത്തകരും ഈ പ്രതിഷേധറാലിയിൽ പങ്കെടുക്കുന്നുണ്ട്.

അതേസമയം, ഇന്ന് മുന്ന് മണിക്ക് സാംസ്‌കാരിക പ്രവർത്തകരുടെ കൂട്ടായ്മയായ കളക്ടീവ് ഫേസ് വണ്ണും കൊച്ചിയിൽ നിന്ന് ലോങ് മാർച്ച് സംഘടിപ്പിക്കുന്നത്. ഗാന്ധി സ്‌ക്വയറിൽ നിന്ന് ഫോർട്ട് കൊച്ചി വാസ്‌കോ സ്‌ക്വയറിലേക്കാണ് ബഹുജനമാർച്ച്.

വൈകുന്നേരം 3 മണിക്ക് ആരംഭിക്കുന്ന മാർച്ച് 7 മണിക്ക് വാസ്‌കോ സ്‌ക്വയറിൽ എത്തിച്ചേരും. മാർച്ചിൽ എൻ. എസ്. മാധവൻ, വേണു (ക്യാമറാമാൻ), കമൽ, രാജീവ് രവി, ആഷിഖ് അബു, റീമ കല്ലിങ്കൽ, ഗീതു മോഹൻദാസ്, ലിജോ ജോസ് പെല്ലിശ്ശേരി, ദിലീഷ് പോത്തൻ, ശീതൾ ശ്യാം, എൻ. എം. പിയേഴ്‌സൻ, ഫാ. അഗസ്റ്റിൻ വട്ടോളി, വി. എം. ഗിരിജ, അൻവർ അലി, എസ്. ഹരീഷ്, ഉണ്ണി ആർ, ശ്യാം പുഷ്‌കരൻ തുടങ്ങിയവർ പങ്കെടുക്കും.

Read Also : പൗരത്വ നിയമ ഭേദഗതി രാജ്യ നന്മയ്ക്ക്; ചിലർ മുസ്ലീങ്ങളെ തെറ്റിദ്ധരിപ്പിക്കുന്നുവെന്ന് പ്രധാനമന്ത്രി

വാസ്‌കോ സ്‌ക്വയറിൽ നടക്കുന്ന സംഗീത സദസിൽ ഊരാളി, ഷഹബാസ് അമൻ, കരിന്തലക്കൂട്ടം, രശ്മി സതീഷ്, പി. കെ. സുനിൽകുമാർ, ജോൺ പി. വർക്കി, പഞ്ചമി തീയറ്റേഴ്‌സ് എന്നിവർ പങ്കെടുക്കും. തൃശൂർ നാടകസംഘത്തിന്റെ ലഘുനാടകങ്ങൾ, തൃശൂർ സ്‌കൂൾ ഓഫ് ഡ്രാമ പൂർവ്വ വിദ്യാർത്ഥികളുടെ പപ്പറ്റ് ഷോ എന്നിവയും ഉണ്ടായിരിക്കും.

Story Highlights Citizenship Amendment Act