ഇഴഞ്ഞ് നീങ്ങുന്ന അഞ്ചൽ ബൈപ്പാസ് നിർമാണം; പ്രതിഷേധവുമായി നാട്ടുകാർ

കൊല്ലം അഞ്ചൽ ബൈപ്പാസ് നിർമാണം ഇഴഞ്ഞ് നീങ്ങുന്നതിൽ പ്രതിഷേധവുമായി നാട്ടുകാർ രംഗത്ത്. 2001ൽ പി എസ് സുപാൽ പുനലൂർ എംഎൽഎ ആയിരിക്കെയാണ് പദ്ധതിയുടെ പ്രാരംഭ പ്രവർത്തനങ്ങൾ ആരംഭിച്ചത്. 19 വർഷം കടഞ്ഞിട്ടും നിർമാണം എങ്ങുമെത്തിയിട്ടില്ല.

Read Also: കൊല്ലം അഞ്ചലിൽ തടി മില്ലിന് തീപിടിച്ചു; 50 ലക്ഷം രൂപയുടെ നാശനഷ്ടം

2014 ആഗസ്റ്റ് അഞ്ചിന് മുൻ മന്ത്രി വി കെ ഇബ്രാഹിം കുഞ്ഞ് ആഘോഷമായി നിർമാണോദ്ഘാടനം നിർവഹിച്ചു. അഞ്ചൽ നിവാസികളുടെ പതിറ്റാണ്ടുകളായുള്ള ആവശ്യമായ ബൈപ്പാസിന്റെ നിർമാണം ആരംഭിച്ചതിന്റെ ക്രെഡിറ്റ് തങ്ങൾക്കുള്ളതാണെന്ന് ഇടത്- വലത് രാഷ്ട്രീയ പ്രതിനിധികൾ അവകാശപ്പെട്ടു. പക്ഷേ ഒച്ച് ഇഴയും വേഗത്തിലാണ് ഇപ്പോൾ നിർമാണ പ്രവർത്തനമെന്നാണ് നാട്ടുകാർ ആരോപിക്കുന്നത്.

സ്ഥലമേറ്റെടുക്കലുമായി ബന്ധപ്പെട്ടുള്ള ആശയക്കുഴപ്പമാണ് നിർമാണം വൈകുന്നതിന് കാരണമെന്നാണ് അധികൃതരുടെ വിശദീകരണം. ആശയക്കുഴപ്പങ്ങളെല്ലാം പരിഹരിച്ച് ഈ വർഷം തന്നെ പണി പൂർത്തീകരിക്കും. 18 മീറ്റർ വീതിയിൽ, നാല് കലുങ്കുകൾ ഉൾപ്പടെ നിർമിക്കുന്ന ബൈപ്പാസിന് രണ്ട് കിലോമീറ്റർ ദൂരമാണുള്ളത്. പദ്ധതി യാഥാർത്ഥ്യമായാൽ അഞ്ചൽ ടൗണിലെ ഗതാഗതക്കുരുക്ക് ഒരു പരിധി വരെ പരിഹരിക്കാൻ കഴിയും.

kollam anjal bypass