അണ്ടർ-19 ലോകകപ്പ്: ഇന്ത്യ-പാകിസ്താൻ സെമിഫൈനൽ നാളെ

അണ്ടർ-19 ലോകകപ്പിലെ ആദ്യ സെമിഫൈനൽ നാളെ. രാജ്യാന്തര ക്രിക്കറ്റിലെ ഏറ്റവും ആവേശകരമായ പോരാട്ടമായ ഇന്ത്യ-പാകിസ്താൻ മത്സരത്തിനാണ് നാളെ ക്രിക്കറ്റ് ലോകം സാക്ഷ്യം വഹിക്കുക. ഇന്ത്യൻ സമയം ഉച്ചക്ക് 1.30 നാണ് മത്സരം നടക്കുക. ടൂർണമെൻ്റിലെ ശക്തരായ രണ്ട് ടീമുകളാണ് നേർക്കുനേർ ഏറ്റുമുട്ടുക. ചിരവൈരികൾ തമ്മിലുള്ള പോരാട്ടം കൂടി ആയതു കൊണ്ട് തന്നെ മത്സരം ആവേശകരമാകും.

ക്വാർട്ടർ ഫൈനലിൽ ഓസ്ട്രേലിയയെ തകർത്താണ് ഇന്ത്യ അവസാന നാലിലേക്ക് ടിക്കറ്റെടുത്തത്. 74 റൺസിനാണ് ഇന്ത്യ ഓസീസിനെ കെട്ടുകെട്ടിച്ചത്. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 233 റൺസെടുത്തപ്പോൾ മറുപടി ബാറ്റിംഗിനിറങ്ങിയ ഓസ്ട്രേലിയ 43.3 ഓവറിൽ 159 റൺസിന് ഓൾ ഔട്ടാവുകയായിരുന്നു. ഇന്ത്യക്കു വേണ്ടി കാർത്തിക് ത്യാഗി നാലും ആകാശ് സിംഗ് മൂന്നും വിക്കറ്റുകൾ വീഴ്ത്തി.

മറ്റൊരു ഏഷ്യൻ ടീമായ അഫ്ഗാനിസ്ഥാനെതിരെ നടന്ന മത്സരത്തിൽ വിജയിച്ചാണ് പാകിസ്താൻ സെമി ഉറപ്പിച്ചത്. അഫ്ഗാനിസ്ഥാനെ ആറു വിക്കറ്റിനാണ് പാകിസ്ഥാൻ തോൽപിച്ചത്. ആദ്യം ബാറ്റ് ചെയ്ത അഫ്ഗാനിസ്ഥാൻ 189 റൺസ് മാത്രമെടുത്ത് ഓൾ ഔട്ടായി. മറുപടി ബാറ്റിംഗിൽ പാകിസ്താൻ 4 വിക്കറ്റ് നഷ്ടപ്പെടുത്തി വിജയലക്ഷ്യം മറികടക്കുകയായിരുന്നു.

കളിച്ച നാലു മത്സരങ്ങളും ഇന്ത്യ വിജയിച്ചപ്പോൾ പാകിസ്താൻ്റെ അവസാന ഗ്രൂപ്പ് മത്സരം മഴയെത്തുടർന്ന് ഉപേക്ഷിച്ചിരുന്നു. ടൂർണമെൻ്റിലുടനീളം ഇന്ത്യൻ ഉപഭൂഖണ്ഡത്തിലെ ടീമുകൾ കാഴ്ച വെച്ച ആധിപത്യത്തിൻ്റെ ഉദാഹരണമായി ബംഗ്ലാദേശും സെമിയിൽ എത്തിയിട്ടുണ്ട്. വരുന്ന രാജ്യാന്തര ക്രിക്കറ്റ് ലോകത്ത് ഇന്ത്യൻ ഉപഭൂഖണ്ഡത്തിലെ ടീമുകൾ അധിപത്യം ഉറപ്പിക്കുമെന്ന സൂചനയാണ് ഈ അണ്ടർ-19 ലോകകപ്പ് നൽകുന്നത്. സെമിയിൽ ഉൾപ്പെട്ട മൂന്നു ടീമുകൾ ഉൾപ്പെടെ ക്വാർട്ടറിൽ അഫ്ഗാനിസ്ഥാനും കളിച്ചിരുന്നു.

Story Highlights: U-19 World Cup, Pakista, India