കുട്ടനാട് സീറ്റ് എൻസിപിക്ക് തന്നെയെന്ന് ഇടത് മുന്നണി

കുട്ടനാട് ഉപതെരഞ്ഞെടുപ്പിൽ സീറ്റ് എൻസിപിക്ക് തന്നെയെന്ന് തീരുമാനിച്ച് ഇടത് മുന്നണി. എൽഡിഎഫ് യോഗത്തിന് ശേഷം സിപിഐഎം- സിപിഐ നേതാക്കൾ എൻസിപി നേതാക്കളുമായി നടത്തിയ ചർച്ചയിലാണ് സീറ്റ് എൻസിപിക്ക് തന്നെ നൽകാനുള്ള തീരുമാനമെടുത്തത്. എൻസിപിയിൽ നിന്ന് സിപിഐഎം സീറ്റ് ഏറ്റെടുത്തേക്കുമെന്ന് നേരത്തെ അഭ്യൂഹങ്ങളുണ്ടായിരുന്നു.

Read Also: കുട്ടനാട് സീറ്റ് കേരള കോണ്‍ഗ്രസ് എമ്മിന്റേത്, വിട്ടുവീഴ്ചയില്ല : ജോസ് കെ മാണി

നിലവിൽ സീറ്റ് ഏറ്റെടുക്കേണ്ട സാഹചര്യമില്ലെന്ന് നേതാക്കൾ വിലയിരുത്തി. സീറ്റ് ഏറ്റെടുക്കുന്നത് ഇടത് മുന്നണിയുടെ രീതിയല്ലെന്ന് കൺവീനർ എ വിജയരാഘവൻ പറഞ്ഞു.

സ്ഥാനാർത്ഥി നിർണയം എത്രയും വേഗം പൂർത്തിയാക്കാൻ ഇടത് മുന്നണി എൻസിപിക്ക് നിർദ്ദേശം നൽകിയിട്ടുണ്ട്. തോമസ് ചാണ്ടിയുടെ സഹോദരൻ തോമസ് കെ തോമസ് സ്ഥാനാർത്ഥിയാകുമെന്നാണ് സൂചന. തിങ്കളാഴ്ച ചേരുന്ന എൻസിപി യോഗത്തിന് ശേഷം ഇക്കാര്യത്തിൽ അന്തിമ തീരുമാനമെടുക്കും.