ദേവനന്ദയ്ക്ക് നാടിന്റെ യാത്രാമൊഴി; മൃതദേഹം സംസ്‌കരിച്ചു

കൊല്ലത്ത് മരിച്ച ആറ് വയസുകാരി ദേവനന്ദയുടെ മൃതദേഹം സംസ്‌കരിച്ചു. വീട്ടുവളപ്പിലാണ് ദേവനന്ദയ്ക്ക് അന്ത്യ വിശ്രമത്തിനുള്ള സ്ഥലമൊരുക്കിയത്. ദേവനന്ദയെ അവസാനമായി ഒരു നോക്കു കാണാൻ ആയിരങ്ങൾ വീട്ടിലേയ്ക്ക് ഒഴുകിയെത്തി.

പള്ളിമൺ പുലിയില ഇളവൂർ സ്വദേശികളായ പ്രദീപ്-ധന്യ ദമ്പതികളുടെ മകളാണ് ദേവനന്ദ. കുട്ടിയെ ഇന്നലെ രാവിലെയാണ് കാണാതായത്. കുട്ടിയുടെ അമ്മ തുണി അലക്കിക്കൊണ്ടിരിക്കുന്നതിനിടെ കുഞ്ഞിനെ കാണാതാകുകയായിരുന്നു. തുടർന്ന് പൊലീസ് സ്റ്റേഷനിൽ പരാതി നൽകി. പൊലീസും നാട്ടുകാരും ഇന്നലെ തെരച്ചിലിൽ നടത്തിയെങ്കിലും കുഞ്ഞിനെ കണ്ടെത്താൻ സാധിച്ചില്ല. ഇന്ന് രാവിലെ വീടിന് സമീപത്തെ ഇത്തിക്കരയാറ്റിൽ നിന്ന് കുഞ്ഞിന്റെ മൃതദേഹം കണ്ടെത്തുകയായിരുന്നു.

Read also: കാണാതായി ഒരു മണിക്കൂറിനകം മരണം; മൃതദേഹം അഴുകി തുടങ്ങിയിരുന്നു; ദേവനന്ദയുടെ മരണത്തിൽ ഡോക്ടർമാർ

കാണാതായി ഒരു മണിക്കൂറിനകം ദേവനന്ദയുടെ മരണം സംഭവിച്ചുവെന്നാണ് ഡോക്ടർമാർ പറയുന്നത്. കുട്ടിയുടെ മൃതദേഹം പോസ്റ്റുമോർട്ടം നടത്തിയ ഡോക്ടർമാരാണ് ഇക്കാര്യം വ്യക്തമാക്കിയത്. ഉച്ചയ്ക്ക് മുൻപ് മരണം സംഭവിച്ചിരിക്കാം. ശ്വാസകോശത്തിൽ ചെളിയും വെള്ളവും ഉണ്ടായിരുന്നുവെന്നും ഡോക്ടർമാർ വ്യക്തമാക്കുന്നു. കുട്ടി കാലുതെറ്റി വെള്ളത്തിൽ വീണതാകാനാണ് സാധ്യത എന്നാണ് വിലയിരുത്തൽ.