ലോക്ക് ഡൗണ് : സത്യവാങ്മൂലം, വെഹിക്കിള് പാസ് എന്നിവ ഇനി മുതല് ഓണ്ലൈനിലും
ലോക്ക് ഡൗണ് നിയന്ത്രണങ്ങള് തുടരുന്ന സാഹചര്യത്തില് പൊതുജനങ്ങള്ക്ക് അത്യാവശ്യങ്ങള്ക്കായി യാത്ര ചെയ്യുന്നതിനാവശ്യമായ സത്യവാങ്മൂലം, വെഹിക്കിള് പാസ് എന്നിവ ലഭിക്കുന്നതിന് ഓണ്ലൈന് സംവിധാനം ഏര്പ്പെടുത്തി. https://pass.bsafe.kerala.gov.in എന്ന ലിങ്ക് വഴി പൊതുജനങ്ങള്ക്ക് ഈ സൗകര്യം പ്രയോജനപ്പെടുത്താം. സൈബര് ഡോം നോഡല് ഓഫീസര് കൂടിയായ എഡിജിപി മനോജ് എബ്രഹാമിന്റെ നേതൃത്വത്തില് സൈബര് ഡോമിലെ വിദഗ്ധ സംഘമാണ് ഓണ്ലൈന് സംവിധാനം വികസിപ്പിച്ചത്.
വളരെ അത്യാവശ്യ സന്ദര്ഭങ്ങളില് യാത്ര ചെയ്യുന്നതിനാവശ്യമായ സത്യവാങ്മൂലം ഓണ്ലൈനില് ലഭിക്കുവാന് യാത്രക്കാര് പേര്, മേല്വിലാസം, വാഹനത്തിന്റെ നമ്പര്, സഹയാത്രികന്റെ പേര്, യാത്ര പോകേണ്ടതും തിരിച്ചു വരേണ്ടതുമായ സ്ഥലം, തിയതി, സമയം, മൊബൈല് നമ്പര് എന്നിവ രേഖപ്പെടുത്തിയതിന് ശേഷം യാത്രക്കാരന്റെ ഒപ്പ് അപ്ലോഡ് ചെയ്യണം. ഈ വിവരങ്ങള് പൊലീസ് കണ്ട്രോള് സെന്ററില് പരിശോധിച്ചശേഷം സത്യവാങ്മൂലം അംഗീകരിച്ച ലിങ്ക് യാത്രക്കാരന്റെ മൊബൈല് നമ്പറിലേയ്ക്കു മെസേജ് ആയി നല്കും. യാത്രവേളയില് പൊലീസ് പരിശോധനയ്ക്കായി ഈ ലിങ്കില് ലഭിക്കുന്ന സത്യവാങ്മൂലം കാണിച്ചാല് മതിയാകും. അപേക്ഷ നിരസിച്ചിട്ടുണ്ടെങ്കില് ആ വിവരം മൊബൈല് നമ്പറിലേയ്ക്കു മെസേജ് ആയി ലഭിക്കും. ആഴ്ചയില് ഓണ്ലൈന് മുഖാന്തിരം ഉള്ള സത്യവാങ്മൂലം പ്രകാരം പരമാവധി മൂന്ന് തവണ മാത്രമേ യാത്ര അനുവദിക്കുകയുള്ളു.
വെഹിക്കിള് പാസ് ഓണ്ലൈനായി നല്കുന്നത് മരണം, ഒഴിവാക്കാനാകാത്ത ആശുപത്രി സന്ദര്ശനം മുതലായ തികച്ചും ഒഴിവാക്കാനാകാത്ത സാഹചര്യങ്ങളില് മാത്രം ഉപയോഗിക്കാനാണ്. നല്കുന്ന വിവരങ്ങള് തെറ്റാണെന്ന് തെളിഞ്ഞാല് അപേക്ഷകര്ക്കെതിരെ നിയമനടപടി സ്വീകരിക്കും. വളരെ അത്യാവശ്യ സാഹചര്യങ്ങളില് ഉപയോഗിക്കുവാന് ലഭ്യമാക്കിയിട്ടുള്ള ഈ സൗകര്യങ്ങള് ദുരുപയോഗം ചെയ്യുന്നവര്ക്കെതിരെ നിയമ നടപടികള് സ്വീകരിക്കുമെന്ന് ഡിജിപി വ്യക്തമാക്കി.
Story Highlights- Lockdown: Affidavit and Vehicle Pass are now online
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here