മധ്യപ്രദേശിൽ കൊവിഡ് ബാധിച്ച് ഡോക്ടർ മരിച്ചു

മധ്യപ്രദേശിൽ കൊവിഡ്​ ബാധിച്ച്​ ചികിത്സയിലായിരുന്ന ഡോക്​ടർ മരിച്ചു. ജനറൽ ഫിസിഷ്യനായ ശത്രുഘ്​നൻ പഞ്ച്വാനി(55)യാണ്​ മരിച്ചത്​. നാല് ദിവസം മുമ്പാണ്​ ഡോക്​ടർക്ക്​ കൊവിഡ്​ ബാധ സ്​ഥിരീകരിച്ചത്​.

കൊവിഡ് ബാധിച്ച് രാജ്യത്ത് ആരോ​ഗ്യപ്രവർത്തകൻ മരിക്കുന്നത് ആദ്യമാണ്. ശത്രുഘ്​നൻ പഞ്ച്വാനി കൊറോണ രോ​ഗികളെ ചികിത്സിച്ചിട്ടില്ലെന്ന് കൂടെ ജോലി ചെയ്ത ഡോക്ടർമാർ പറയുന്നു. അദ്ദേ​ഹം ചികിത്സിച്ചവരിൽ അധികവും ചേരിയിൽ നിന്നുള്ളവരാണ്. അദ്ദേഹം പലപ്പോഴും രോ​ഗികളിൽ നിന്ന് ഫീസ് വാങ്ങിയിരുന്നില്ലെന്നും സഹപ്രവർത്തകർ പറഞ്ഞു. ​ശത്രുഘ്​നൻ പഞ്ച്വാനിയുടെ ഭാര്യയും മൂന്ന് മക്കളും ഒാസ്ട്രേലിയയിലാണ്.

ഇൻഡോറിൽ ഇതുവരെ 173 പേർക്ക്​ കൊവിഡ്​ ബാധ സ്​ഥിരീകരിച്ചിരുന്നു. 16 മരണമാണ്​ ഇവിടെ റിപ്പോർട്ട്​ ചെയ്​തത്​. തലസ്​ഥാന നഗരിയിൽ ഉൾപ്പെടെ രാജ്യത്ത്​ വിവിധ ഇടങ്ങളിൽ നഴ്​സുമാർക്ക്​ അടക്കം കൊവിഡ്​ ബാധ സ്​ഥിരീകരിച്ചിരുന്നു. ഇത് ആശങ്കയ്ക്ക് ഇടയാക്കിയിട്ടുണ്ട്.