‘ഞങ്ങള് ഹാപ്പിയാണ്, നിങ്ങളോ’; കൊവിഡ് കാലത്ത് സോഷ്യല്‍മീഡിയയില്‍ വൈറലായി നാടന്‍ പാട്ട്

കൊവിഡ് വൈറസ് ബാധയുടെ പശ്ചാത്തലത്തില്‍ എല്ലാവരും വീടുകളില്‍ തന്നെയാണ്. ലോക്ക്ഡൗണ്‍ കാലം തങ്ങളുടെ കലാവാസനകള്‍ പുറത്തറിയിക്കുന്നതിനുള്ള കാലമായാണ് പലരും കാണുന്നത്. ഇപ്പോഴിതാ ലോക്ക്ഡൗണ്‍ കാലത്തെക്കുറിച്ചുള്ള ഒരു നാടന്‍ പാട്ട് സാമൂഹ്യമാധ്യമങ്ങളില്‍ വൈറലാവുകയാണ്.

ഞങ്ങള് ഹാപ്പിയാണ്, നിങ്ങളോ? എന്നു തുടങ്ങുന്ന ഈ നാടന്‍ പാട്ടാണ് ഇപ്പോള്‍ സോഷ്യല്‍ മീഡിയയിലെ താരം. ഞാന്‍ വീട്ടിലാണ് എനിക്ക് വേണ്ടി എന്റെ നാടിനുവേണ്ടി എന്ന ഹാഷ്ടാഗോടെ സോഷ്യല്‍ മീഡിയയിലെത്തിയ ഈ ഗാനം ഇതുവരെ ആയിരക്കണക്കിനാളുകളാണ് കണ്ടത്. ലോക്ഡൗണ്‍ ആണെങ്കിലും വീട്ടില്‍ എല്ലാവരും ഉള്ളതിന്റെ സന്തോഷം ഏറ്റവും കൂടുതല്‍ ആസ്വദിക്കുന്നത് കൂട്ടികളാണ്. അവര്‍ ഈ ലോകത്തു കാണുന്ന കാഴ്ചകളും മാറ്റങ്ങളും ആണ് ഈ നാടന്‍ പാട്ടില്‍ ഉള്‍പ്പെടുത്തിയിരിക്കുന്നത്.

രണ്ടര പതിറ്റാണ്ടായി കലാരംഗത്തുള്ള പ്രസീദ് കത്തിപ്പാറയാണ് നാടന്‍ പാട്ടിന്റെ രചനയും സംഗീതവും നിര്‍വഹിച്ചിരിക്കുന്നത്. ആലാപനത്തിലും അദ്ദേഹത്തിന്റെ കൈയ്യൊപ്പുണ്ട്. അടിമാലി ജനമൈത്രി പൊലീസ്, ഇടുക്കി വോയ്‌സ്, നാട്യഞ്ജലി സ്‌കൂള്‍ ഓഫ് ഡാന്‍സ്, ടീം രസികര്‍ എന്നിവയുടെ സഹകരണത്തോടെയാണ് ഈ നാടന്‍ പാട്ടിന്റെ വീഡിയോ ചിത്രീകരണം പൂര്‍ത്തിയാക്കിയത്.