ന്യൂസീലൻഡ് പര്യടനം; ഒരു പാക് താരത്തിനു കൂടി കൊവിഡ്; അന്വേഷണം

ന്യൂസീലൻഡ് പര്യടനത്തിനെത്തിയ ഒരു പാകിസ്താൻ താരത്തിനു കൂടി കൊവിഡ്. ഇതോടെ പാക് സ്ക്വാഡിൽ ആകെ 8 താരങ്ങൾക്കാണ് കൊവിഡ് സ്ഥിരീകരിച്ചത്. കൊവിഡ് പ്രോട്ടോകോൾ ലംഘനത്തെ തുടർന്ന് ന്യൂസീലൻഡ് ആരോഗ്യവകുപ്പ് അന്വേഷണം പ്രഖ്യാപിച്ച മൂന്ന് താരങ്ങളിൽ പെട്ടയാൾക്കാണ് ഇപ്പോൾ കൊവിഡ് സ്ഥിരീകരിച്ചത്. നേരത്തെ കൊവിഡ് സ്ഥിരീകരിച്ച രണ്ട് താരങ്ങളെ പറ്റി അന്വേഷണം പുരോഗമിക്കുകയാണ്.

Read Also : ന്യൂസീലൻഡ് പര്യടനത്തിൽ എത്തിയ പാക് ടീമിലെ ഒരു താരത്തിനു കൂടി കൊവിഡ്

അതേസമയം, കൊവിഡ് മാനദണ്ഡങ്ങൾ ലംഘിച്ചതിൻ്റെ പശ്ചാത്തലത്തിൽ പാക് താരങ്ങളെ രാജ്യത്തു നിന്ന് പുറത്താക്കുമെന്ന് ന്യൂസീലൻഡ് സർക്കാർ താക്കീത് നൽകിയിരുന്നു. ഒരു തവണ കൂടി ലംഘനമുണ്ടായാൽ രാജ്യത്തു നിന്ന് തന്നെ താരങ്ങളെ പുറത്താക്കുമെന്ന് ന്യൂസീലൻഡ് ആരോഗ്യവകുപ്പ് അറിയിച്ചു. ന്യൂസീലൻഡ് പര്യടനത്തിനെത്തിയ പാകിസ്താൻ ക്രിക്കറ്റ് ടീമിലെ ആറ് താരങ്ങൾക്ക് കൊവിഡ് സ്ഥിരീകരിച്ചിരുന്നു. ടീം അംഗങ്ങളിൽ പലരും കൊവിഡ് പ്രോട്ടോക്കോൾ ലംഘിക്കുന്നതായി സിസിടിവി ദൃശ്യങ്ങളിൽ നിന്ന് വ്യക്തമായെന്ന് ന്യൂസീലൻഡ് ആരോഗ്യവകുപ്പ് പറഞ്ഞു. ഇതിൻ്റെ പശ്ചാത്തലത്തിലായിരുന്നു മുന്നറിയിപ്പ്. പാകിസ്താൻ ക്രിക്കറ്റ് ബോർഡ് സിഇഒ വാസിം ഖാൻ താരങ്ങളുമായി നടത്തിയ വാട്‌സപ്പ് സന്ദേശത്തിലാണ് ന്യൂസീലൻഡ് നൽകിയ മുന്നറിയിപ്പിനെപ്പറ്റി വെളിപ്പെടുത്തിയത്.

ഡിസംബർ 18നാണ് പാകിസ്താൻ്റെ ന്യൂസീലൻഡ് പര്യടനം ആരംഭിക്കുന്നത്. മൂന്ന് ടി-20കളും രണ്ട് ടെസ്റ്റുകളുമാണ് പര്യടനത്തിൽ ഉള്ളത്.

Story Highlights – Eighth member of Pakistan squad tests COVID-19 positive