കൊയിലാണ്ടിയിൽ പ്രണയിച്ചു വിവാഹം കഴിച്ചവർക്കെതിരായ ഗൂണ്ടാ ആക്രമണം; ഒരാൾ പിടിയിൽ
കോഴിക്കോട് കൊയിലാണ്ടിയിൽ പ്രണയിച്ച് വിവാഹം കഴിച്ചവർക്കെതിരെ ഗൂണ്ടാ ആക്രമണം നടത്തിയ പ്രതി പിടിയിൽ. വധുവിന്റെ അമ്മാവനാണ് പിടിയിലായത്. കൊയിലാണ്ടി നടേരിയിലെ വി.സി കബീറിനെയാണ് പൊലീസ് അറസ്റ്റ് ചെയ്തത്. കൊയിലാണ്ടി സിഐ കെ സി സുബാഷ് ബാബുവിന്റെ നേതൃത്വത്തിലാണ് അന്വേഷണം.
നാല് ദിവസം മുൻപാണ് നാടിനെ നടുക്കുന്ന ഗൂണ്ടാ ആക്രമണത്തിന് കൊയിലാണ്ടി സാക്ഷ്യം വഹിച്ചത്. മുഹമ്മദ് സ്വാലിഹ് എന്ന യുവാവ് പ്രണയിച്ച പെൺകുട്ടിയെ വിവാഹം കഴിച്ചതാണ് പെൺകുട്ടിയുടെ അമ്മാവനെ പ്രകോപിതനാക്കിയത്.
പെൺകുട്ടിയുടെ വീട്ടിൽ നിന്നുണ്ടായ കടുത്ത എതിർപ്പിനെ മറികടന്നായിരുന്നു വിവാഹം. പെൺകുട്ടിയുടെ ബന്ധുക്കളായ കബീർ, മൻസൂർ എന്നിവരടക്കമുള്ള എട്ടംഗ സംഘമാണ് സ്വാലിഹിനെയും ഭാര്യയെയും വാഹനത്തിലുണ്ടായിരുന്ന സുഹൃത്തുക്കളേയും ആക്രമിച്ചത്.
വിവാഹത്തിനായി കാറിൽ വരികയായിരുന്ന വധുവിനെയും വരനേയും വഴിയിൽ തടഞ്ഞ് നിർത്തിയാണ് എട്ടംഗ ഗൂണ്ടാ സംഘം ആക്രമണം അഴിച്ചുവിട്ടത്. വടിവാൾ അടക്കമുള്ള മാരകായുധങ്ങൾ ഉപയോഗിച്ച് വരനെയും വരന്റെ സുഹൃത്തുക്കളെയും വെട്ടി പരുക്കേൽപ്പിച്ചു.
ഇതിന് പിന്നാലെ ബന്ധുക്കൾക്കെതിരെ യുവതി രംഗത്തെത്തി. സ്വന്തം കുടുംബത്തിൽ വാപ്പയും ഉമ്മയും അടക്കം എല്ലാവർക്കും വിവാഹത്തിന് സമ്മതമാണെന്ന് വധു ഫർഹാന പറഞ്ഞു.
Story Highlights – koylandi goonda attack
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here