ഐപിഎലിൽ വിർച്വൽ ഗസ്റ്റ് ആയി ഇഷാന്ത് ശർമ്മ; അവിശ്വസനീയമെന്ന് ആരാധകർ

ഇന്ത്യൻ പ്രീമിയർ ലീഗിലെ വിർച്വൽ ഗസ്റ്റ് ആയി ദേശീയ താരം ഇഷാന്ത് ശർമ്മ. സ്റ്റേഡിയത്തിലെ സ്ക്രീനിൽ ‘റുപേ’യുടെ വിർച്വൽ ഗസ്റ്റ് ആയാണ് ഇഷാന്ത് പ്രത്യക്ഷപ്പെട്ടത്. ഇന്ത്യൻ ടെസ്റ്റ് ടീമിലെ അംഗമായ, കഴിഞ്ഞ സീസൺ വരെ ഐപിഎലിൽ കളിച്ചുകൊണ്ടിരുന്ന ഇഷാന്ത് വിർച്വൽ ഗസ്റ്റായി പ്രത്യക്ഷപ്പെട്ടത് അവിശ്വസനീയമാണെന്ന് ആരാധകർ പറയുന്നു.

അതേസമയം, ഇന്ത്യൻ പ്രീമിയർ ലീഗ് 2023-27 സീസണുകളുടെ സംപ്രേഷണാവകാശത്തിനായി മുടക്കേണ്ടത് 32,890 കോടി രൂപയാണെന്നാണ് റിപ്പോർട്ട്. നാല് ബണ്ടിലുകളായാവും സംപ്രേഷണാവകാശം നൽകുക. ഒടിടി, ടെലിവിഷൻ സംപ്രേഷണങ്ങൾ ഉൾപ്പെടെ വിവിധ വിഭാഗങ്ങളിൽ പെട്ട മത്സരങ്ങൾ നാല് ബണ്ടിലുകളാക്കി തിരിച്ചിരിക്കുകയാണ്. ഓരോ ബണ്ടിലും ഓരോ കമ്പനികളാവും സ്വന്തമാക്കുക. ഈ നാല് ബണ്ടിലുകൾക്കും കൂടിയാണ് 32,890 കോടി രൂപ ബിസിസിഐക്ക് ലഭിക്കുക. ജൂൺ 12നാണ് സംപ്രേഷണാവകാശത്തിനുള്ള ലേലം നടക്കുക.

ഇന്ത്യാ വൻകരയിലെ സംപ്രേഷണാവകാശമാണ് ബണ്ടിൽ എയിൽ ഉള്ളത്. ഓരോ മത്സരത്തിനും 49 കോടി രൂപ വച്ച് ആകെ 18,130 കോടി രൂപയാണ് ഈ ബണ്ടിലിനായി മുടക്കേണ്ടത്. ഡിജിറ്റൽ സംപ്രേഷണാവകാശത്തിനായി ഒരു മത്സരത്തിന് 33 കോടി രൂപ വച്ച് ആകെ 12,210 കോടി രൂപ നൽകണം. ബണ്ടിൽ സിയിൽ 18 മത്സരങ്ങളുണ്ട്. ഓപ്പണിംഗ് മത്സരങ്ങൾ, നാല് പ്ലേ ഓഫ് മത്സരങ്ങൾ, ഡബിൾ ഹെഡറുകളിലെ രാത്രി മത്സരങ്ങൾ എന്നിവയ്ക്കായി ആകെ 1440 കോടി രൂപയാണ് തുക. ഇത് ഒടിടിയ്ക്ക് മാത്രമേ ലഭിക്കൂ. ബണ്ടിൽ ഡിയിലുള്ളത് ലോകത്തിൻ്റെ മറ്റിടങ്ങളിലെ സംപ്രേഷണാവകാശമാണ്. ഇതിനായി ഒരു മത്സരത്തിന് 3 കോടി രൂപ വച്ച് 1110 കോടി രൂപ മുടക്കണം. ഇന്ത്യക്ക് പുറത്ത് ടെലിവിഷൻ, ഡിജിറ്റൽ അവകാശങ്ങൾ ഉള്ളവർക്കേ ഇത് നൽകൂ.

Story Highlights: ishant sharma ipl virtual guest