രാഹുൽ ഗാന്ധിയെ രാമനോട് ഉപമിച്ച് സൽമാൻ ഖുർഷിദ്, വിമർശനവുമായി ബിജെപി

രാഹുൽ ഗാന്ധിയെ ശ്രീരാമനുമായി താരതമ്യം ചെയ്ത് മുതിർന്ന കോൺഗ്രസ് നേതാവ് സൽമാൻ ഖുർഷിദ്. ഒരു യോഗിയെ പോലെയാണ് രാഹുൽ തന്റെ തപസ്യ ശ്രദ്ധയോടെ ചെയ്യുന്നത്. കൊടും തണുപ്പിൽ ഭാരത് ജോഡോ യാത്രികർ ജാക്കറ്റ് ഉപയോഗിക്കുമ്പോൾ അദ്ദേഹം ടീ ഷർട്ട് മാത്രമാണ് ധരിക്കുന്നതെന്നും രാഹുൽ ഒരു അമാനുഷികനാണെന്നും സൽമാൻ ഖുർഷിദ് പറഞ്ഞു.

‘ഭഗവാന്റെ ‘ഖദൗ’ അദ്ദേഹത്തോടൊപ്പം വളരെ ദൂരെ സഞ്ചരിക്കാറുണ്ട്. ചിലപ്പോൾ ശ്രീരാമന് എത്തിച്ചേരാൻ കഴിയാതെ വരുമ്പോൾ, ഭരത് ഒരു ഖദൗയുമായി ഓരോ സ്ഥലങ്ങളിലേക്കും പോകുന്നു. അതുപോലെയാണ് ഞങ്ങൾ ഉത്തർപ്രദേശിൽ ഖദൗയുമായി എത്തിയത്, ഇനി റാം ജിയും (രാഹുൽ ഗാന്ധി) വരും.’- സൽമാൻ ഖുർഷിദ് പറഞ്ഞു. അതേസമയം പ്രസ്താവനയെ വിമർശിച്ച് ബിജെപി രംഗത്തുവന്നു.

സൽമാൻ ഖുർഷിദിൻ്റെ പ്രസ്താവന ഹിന്ദുത്വത്തെ അപമാനിക്കുന്നതിന് തുല്യമാണെന്ന് ബിജെപിയുടെ ഷെഹ്‌സാദ് പൂനവല്ല ആരോപിച്ചു. “സൽമാൻ ഖുർഷിദ് രാഹുൽ ഗാന്ധിയെ ഭഗവാൻ ശ്രീരാമനോട് സമമാക്കി, തന്നെ ഭാരതത്തോട്!! ആരെയെങ്കിലും മറ്റ് മതങ്ങളുടെ ദൈവവുമായി താരതമ്യം ചെയ്യാൻ ധൈര്യപ്പെടുമോ?”- പൂനവല്ല ചോദിച്ചു.

Story Highlights: Congress’s Salman Khurshid compares Rahul Gandhi to Lord Ram