ഏകീകൃത സിവില്‍ കോഡ്: സിപിഐഎം സെമിനാറിന്റെ സംഘാടക സമിതിയില്‍ സമസ്ത അംഗം; താന്‍ ഒന്നും അറിഞ്ഞിട്ടേയില്ലെന്ന് മുസ്തഫ മുണ്ടുപാറ

ഏകീകൃത സിവില്‍ കോഡിനെതിരായി സിപിഐഎം സംഘടിപ്പിക്കുന്ന സെമിനാറിന്റെ സംഘാടക സമിതിയില്‍ സമസ്ത അംഗം മുസ്തഫ മുണ്ടുപാറയും. സമസ്ത യുവജന സംഘടനയായ എസ് വൈ എസിന്റെ സംസ്ഥാന സെക്രട്ടറിയാണ് മുസ്തഫ മുണ്ടുപാറ. (samastha leader Organizing member cpim seminar uniform civil code)

എന്നാല്‍ സിപിഐഎം സെമിനാറിന്റെ സംഘാടക സമിതിയില്‍ തന്റെ പേര് വന്നതെങ്ങനെയെന്ന് അറിയില്ലെന്ന് മുസ്തഫ മുണ്ടുപാറ ട്വന്റിഫോറിനോട് പറഞ്ഞു. തന്നോട് ചോദിച്ചിട്ടല്ല സംഘാടക സമിതി വൈസ് ചെയര്‍മാനാക്കിയത്. സെമിനാറില്‍ പങ്കെടുക്കുന്ന കാര്യം തന്നെ തീരുമാനിച്ചിട്ടില്ല. സമസ്തയാണ് ആ കാര്യത്തില്‍ തീരുമാനം എടുക്കേണ്ടത്. ഇന്ന് വൈകീട്ട് ചേരുന്ന യോഗത്തിലെ സംഘടന തന്നെ ഈ വിഷയത്തില്‍ തീരുമാനം എടുക്കും. താന്‍ സംഘാടക സമിതി വൈസ് ചെയര്‍മാനായത് മാധ്യമങ്ങളിലൂടെയാണ് അറിയുന്നതെന്നും അദ്ദേഹം കൂട്ടിച്ചേര്‍ത്തു.

Read Also:സർക്കാർ വാഗ്ദാനത്തിൽ പ്രതിമ നിർമിച്ച ശിൽപി പെരുവഴിയിലായ സംഭവം; കുടിശിക ഏറ്റെടുത്ത് സുരേഷ് ഗോപി

ഏക സിവില്‍ കോഡില്‍ എതിര്‍പ്പറിയിച്ച് നേരത്തെ തന്നെ സമസ്ത രംഗത്തെത്തിയിരുന്നു. ഇത് ഒരു മതത്തിനും അംഗീകരിക്കാന്‍ ആകില്ലെന്നാണ് സമസ്ത അധ്യക്ഷന്‍ ജിഫ്രി മുത്തുക്കോയ തങ്ങള്‍ പറഞ്ഞത്. ഈ വിഷയത്തില്‍ മുസ്ലീം ലീഗും പ്രതിഷേധവുമായി മുന്നോട്ടു വന്നിട്ടുണ്ട്. സിപിഐഎം സെമിനാറിലേക്ക് മുസ്ലീം ലീഗിനും ഔദ്യോഗികമായി ക്ഷണം ലഭിച്ചിട്ടുണ്ട്.

Story Highlights: samastha leader Organizing member cpim seminar uniform civil code