രാഹുല്‍ വിട്ടുനില്‍ക്കുന്നത് തിരിച്ചടിയാകുമെന്ന് എ ഗ്രൂപ്പിന്റെ വിലയിരുത്തല്‍; എംഎല്‍എയെ വീണ്ടും പാലക്കാട് എത്തിക്കാന്‍ നീക്കം; ഷാഫി പറമ്പിലിന്റെ നേതൃത്വത്തില്‍ എ ഗ്രൂപ്പ് യോഗം നടന്നെന്ന് സൂചന

ലൈംഗികാരോപണ വിവാദത്തിന് പിന്നാലെ സസ്‌പെന്‍ഡ് ചെയ്യപ്പെട്ട രാഹുല്‍ മാങ്കൂട്ടത്തില്‍ എംഎല്‍എയെ വീണ്ടും പാലക്കാട് എത്തിക്കാന്‍ എ ഗ്രൂപ്പിന്റെ ശ്രമം. ഷാഫി പറമ്പില്‍ എംപിയുടെ മുന്‍കൈയിലാണ് ഇത്തരമൊരു നീക്കം നടക്കുന്നത്. രാഹുല്‍ മാങ്കൂട്ടത്തില്‍ വിട്ടുനില്‍ക്കുന്നത് തിരിച്ചടിയാകുമെന്നാണ് എഗ്രൂപ്പിന്റെ വിലയിരുത്തല്‍. ഷാഫി പറമ്പിലിന്റെ നേതൃത്വത്തില്‍ എ ഗ്രൂപ്പിന്റെ യോഗം ചേര്‍ന്നു. ( a group meeting regarding rahul mamkoottathil issue)

കെപിസിസിയുടെ പ്രധാന നേതാവിന്റെ പാലക്കാട് നഗരത്തിലുള്ള വീട്ടില്‍ വച്ച് എ ഗ്രൂപ്പ് യോഗം നടന്നെന്നാണ് പുറത്തുവരുന്ന വിവരം. പാലക്കാടേക്ക് രാഹുല്‍ വന്നാല്‍ വലിയ പ്രതിഷേധം നേരിടേണ്ടി വരുമെന്നും ചിലപ്പോള്‍ കവചമൊരുക്കാന്‍ കഴിയാതെ വരുമെന്നുമായിരുന്നു ഡിസിസിയുടെ വിലയിരുത്തല്‍. എന്നാല്‍ ഏറെക്കാലം രാഹുല്‍ പാലക്കാട് നിന്ന് വിട്ടുനില്‍ക്കുന്നത് പാര്‍ട്ടിക്കാകെ തിരിച്ചടിയാകുമെന്നാണ് എ ഗ്രൂപ്പിന്റെ വാദം. വിവിധ പ്രാദേശിക കൂട്ടായ്മകളുടേയും ക്ലബുകളുടേയും പരിപാടികളില്‍ രാഹുലിനെ പങ്കെടുപ്പിച്ച് സ്വാധീനം ഉറപ്പിക്കുക എന്നതാണ് എ ഗ്രൂപ്പ് ലക്ഷ്യമിടുന്നത്.

Read Also: എ കെ ശശീന്ദ്രന്റെ സഹോദരിപുത്രിയുടെ മരണം കൊലപാതകം; കൊലയ്ക്ക് ശേഷം ഭര്‍ത്താവ് ആത്മഹത്യ ചെയ്‌തെന്ന് പൊലീസ്

രാഹുല്‍ പാലക്കാടേക്ക് തിരിച്ചെത്തുന്നത് വൈകരുതെന്നും അത് ഓണക്കാലത്ത് തന്നെ വേണമെന്നുമാണ് രാഹുലിന്റെ മെന്ററായി അറിയപ്പെടുന്ന ഷാഫി പറമ്പില്‍ ഉള്‍പ്പെടെയുള്ളവരുടെ അഭിപ്രായം. രാഹുല്‍ ഉടന്‍ പാലക്കാട്ടെ ഓഫിസിലേക്ക് മടങ്ങിയെത്തുമെന്ന് രാഹുലിന്റെ ജീവനക്കാര്‍ കഴിഞ്ഞ ദിവസം പറഞ്ഞിരുന്നു. ഇതിന് മുന്നൊരുക്കമായാണ് എ ഗ്രൂപ്പ് കൂടിയാലോചന നടത്തിയിരിക്കുന്നത്.

Story Highlights : a group meeting regarding rahul mamkoottathil issue