കെ.എം. മാണിയുടെ രാഷ്ട്രീയ നിലപാട് ഉടന്‍ പ്രഖ്യാപിക്കും

ചെങ്ങന്നൂര്‍ ഉപതിരഞ്ഞെടുപ്പില്‍ കെ.എം. മാണിയുടെ കേരള കോണ്‍ഗ്രസ് സ്വീകരിക്കുന്ന രാഷ്ട്രീയ നിലപാട് ഉടന്‍ പ്രഖ്യാപിക്കും. നിര്‍ണായകമായ ചര്‍ച്ചകള്‍ക്ക് ശേഷം കേരള കോണ്‍ഗ്രസിന്റെ ഉപസമിതിയായിരിക്കും റിപ്പോര്‍ട്ട് സമര്‍പ്പിക്കുക. അതിന് ശേഷം പാര്‍ട്ടി നേതൃത്വം ഔദ്യോഗികമായി രാഷ്ട്രീയ നിലപാട് പ്രഖ്യാപിച്ചേക്കും. കെ.എം. മാണിയുടെ വസതിയിലാണ് ഉപസമിതി യോഗം നടക്കുന്നത്. യുഡിഎഫ് നേതാക്കള്‍ ഇന്നലെ കെ.എം. മാണിയുടെ പാലായിലുള്ള വസതിയിലെത്തി ചര്‍ച്ച നടത്തിയിരുന്നു. കെ.എം. മാണി യുഡിഎഫിന് അനുകൂലമായ നിലപാട് സ്വീകരിക്കുമെന്നാണ് പ്രതീക്ഷിക്കുന്നതെന്ന് ഇന്നലെ നടന്ന കൂടിക്കാഴ്ചയ്ക്ക് ശേഷം യുഡിഎഫ് നേതാക്കള്‍ മാധ്യമങ്ങളോട് പറഞ്ഞിരുന്നു.