ഓണം വരവായ്,ഓണച്ചിത്രങ്ങളും…..

ഉത്സവസീസണാണ് വരുന്നത്. തിയേറ്ററുകളിൽ ഇനി തിരക്കോട് തിരക്കാവും. ഓണം അടിച്ചുപൊളിക്കാനായ് തിയേറ്ററുകളിലെത്താൻ ഓണം റിലീസ് ചിത്രങ്ങൾ തയ്യാറായിക്കഴിഞ്ഞു.

മോഹൻലാലിന്റെ രണ്ട് സൂപ്പർ റിലീസുകളാണ് ഓണത്തിനെത്തുക.പ്രിയദർശൻ സംവിധാനം ചെയ്യുന്ന ഒപ്പം,തെലുങ്ക് ചിത്രം ജനതാ ഗാരേജ് എന്നിവ. ജനതാ ഗാരേജ് മലയാളം പതിപ്പാണ് കേരളത്തിലെ തിയേറ്ററുകളിലെത്തുക. ജൂനിയർ എൻടിആറും ഉണ്ണിമുകുന്ദനുമാണ് ചിത്രത്തിലെ മറ്റ് പ്രധാന താരങ്ങൾ.സെപ്തംബർ രണ്ടിനാണ് റിലീസ്.

തിരുവോണം റിലീസാണ് ഒപ്പം.അന്ധനായ കഥാപാത്രമായി മോഹൻലാൽ എത്തുന്ന ചിത്രത്തിൽ വിമലാരാമനാണ് നായിക.സസ്‌പെൻസ് ത്രില്ലർ ചിത്രമാണിത്.സെപ്തംബർ ഏഴിനാണ് റിലീസ്.

മെമ്മറീസിനു ശേഷം പൃഥ്വിരാജ് ജിത്തുജോസഫ് ടീം ഒന്നിക്കുന്ന ഊഴം സെപ്തംബർ എട്ടിന് തിയേറ്ററുകളിലെത്തും. കുഞ്ചാക്കോ ബോബൻ സിദ്ധാർഥ് ശിവ ടീമിന്റെ കൊച്ചൗവ്വ പൗലോ അയ്യപ്പകൊയ്‌ലോ,ജൂഡ് ആന്റണി സംവിധാനം ച്യെയുന്ന ഒരു മുത്തശ്ശി ഗദ എന്നിവയും ഓണത്തിനെത്തും.ധ്യാൻ ശ്രീനിവാസൻ നായകനായ ഒരേ മുഖവും ഓണം റിലീസാണ്.

ദിലീപിന്റെ ഉത്സവകാലചിത്രമായി എത്തുന്നത് വെൽകം ടു സെൻട്രൽ ജയിൽ ആണ്.സുന്ദർദാസ് സംവിധാനം ചെയ്യുന്ന ചിത്രത്തിൽ ജയിലിനെ വീടായി കാണുന്ന നായകനായാണ് ദിലീപ് എത്തുന്നത്. വേദികയാണ് നായിക.സെപ്തംബർ എട്ടിനാണ് ചിത്രത്തിന്റെ റിലീസ്.

വിക്രം നായകനായ സയൻസ് ഫിക്ഷൻ ബിഗ് ബജറ്റ് ചിത്രം ഇരുമുഗൻ സെപ്തംബർ രണ്ടിനാണ് എത്തുക. നയൻതാരയും നിത്യാ മേനോനുമാണ് നായികമാർ. വിക്രം ഡബിൾ റോളുകളിലെത്തുന്ന ഈ ആനന്ദ് ശങ്കർ ചിത്രത്തെ ഏറെ പ്രതീക്ഷയോടെയാണ് സിനിമാ ലോകം കാത്തിരിക്കുന്നത്.

ട്രെയിൻ യാത്രയിലെ സംഭവവികാസങ്ങൾ പ്രമേയമാകുന്ന ധനുഷ് ചിത്രം തൊടരിയും സെപ്തംബർ ആദ്യവാരമെത്തും.കീർത്തി സുരേഷാണ് നായിക.