ജൂലൈ മുതൽ മൊബൈൽ നമ്പറുകൾക്ക് 13 അക്കം ?

ജൂലൈ മാസം മുതൽ രാജ്യത്തെ മൊബൈൽ നമ്പറുകളുടെ അക്കം പതിമൂന്നാകും. സുരക്ഷ വർധിപ്പിക്കുന്നതിന്റെ ഭാഗമായിയാണ് നടപടി. ഇത് സംബന്ധിച്ച അറിയിപ്പ് ടെലികോം മന്ത്രാലയം വിവിധ മൊബൈൽ കമ്പനികൾക്ക് നൽകി കഴിഞ്ഞു. എന്നാൽ നമ്പർ മാറ്റാനുള്ള ഈ നടപടി നമ്മെ ബാധിക്കില്ലെന്നതാണ് വാസ്തവം.

എം2എം (മെഷീൻ ടു മെഷീൻ) സിം കാർഡുകളുടെ നമ്പർ മാത്രമാണ് 13 അക്കമാക്കി മാറ്റാൻ കേന്ദ്ര സർക്കാർ ആവശ്യപ്പെട്ടിരിക്കുന്നത്. അതായത് ഓട്ടോമേറ്റഡ് മെഷീനുകളിൽ ഉപയോഗിക്കുന്ന സിം കാർഡുകൾക്കായിരിക്കും ഈ തീരുമാനം ബാധകമാവുന്നത്. ഓട്ടോമേറ്റഡ് മെഷീനുകൾക്ക് ഇന്റർനെറ്റ് കണക്ടിവിറ്റി ലഭ്യമാക്കാൻ വേണ്ടി ഉപയോഗിക്കുന്ന സിം കാർഡുകളാണ് ഈ വിഭാഗത്തിൽ പെടുന്നത്.

ഇപ്പോഴുള്ള 10 അക്ക എം2എം നമ്പറുകൾ 2018 ഒക്ടോബർ ഒന്നു മുതൽ 13 അക്കത്തിലേക്ക് മാറ്റണമെന്നാണ് ടെലികോം മന്ത്രാലയം കമ്പനികളോട് ആവശ്യപ്പെട്ടിരിക്കുന്നത്. ഡിസംബർ 31ന് മുൻപ് ഇത് പൂർത്തീകരിക്കണമെന്നും നിർദ്ദേശമുണ്ട്.