കര്‍ദിനാളിനെതിരെ ഉടന്‍ കേസ് എടുത്തേക്കും

എറണാകുളം-അങ്കമാലി അതിരൂപതയുടെ ഭൂമിവില്‍പ്പന വിവാദവുമായി ബന്ധപ്പെട്ട് ഉടന്‍ കേസ് എടുത്ത് അന്വേഷണം ആരംഭിച്ചേക്കും. കര്‍ദിനാള്‍ മാര്‍. ജോര്‍ജ്ജ് ആലഞ്ചേരിക്കെതിരെയും മറ്റ് ചില വൈദികര്‍ക്കെതിരെയും കേസ് എടുത്താകും അന്വേഷണം ആരംഭിക്കുക. കര്‍ദിനാളിനെതിരെയും അതിരൂപതക്കെതിരെയും കേസ് എടുത്ത് അന്വേഷണം നടത്തണമെന്ന് ഹൈക്കോടതി വിധിച്ചിട്ട് ദിവസങ്ങള്‍ കഴിഞ്ഞിട്ടും കേസ് എടുക്കാന്‍ പോലീസ് തയ്യാറാകാത്തതില്‍ പ്രതിഷേധിച്ച് ഹൈക്കോടതിയില്‍ കോടതിയലക്ഷ്യത്തിനും പരാതിക്കാരന്‍ പുതിയ ഹര്‍ജി നല്‍കിയിട്ടുണ്ട്. ഈ സാഹചര്യത്തില്‍ കോടതിയലക്ഷ്യത്തെ പ്രതിരോധിക്കാന്‍ പോലീസ് ഉടന്‍ തന്നെ കര്‍ദിനാളിനെതിരെ കേസ് ഫയല്‍ ചെയ്ത് അന്വേഷണം ആരംഭിക്കാനാണ് സാധ്യത.