ലിബിയൻ കടൽത്തീരത്ത് ബോട്ടു മറിഞ്ഞു; നൂറിലധികം അഭയാർഥികളെ കാണാതായി

ലിബിയൻ കടൽത്തീരത്ത് ബോട്ടുമറിഞ്ഞ് നൂറിലധികം അഭയാർഥികളെ കാണാതായി. ഇവരെല്ലാം കടലിൽ മുങ്ങിമരിച്ചിട്ടുണ്ടാകാമെന്ന് ലിബിയൻ തീരദേശ സേന അറിയിച്ചു.

മെഡിറ്ററേനിയൻ കടലിലൂടെ യൂറോപ്പിലേക്ക് കടക്കാൻ ശ്രമിച്ച അഭയാർഥി സംഘമാണ് ലിബിയക്കടുത്ത് കടലിൽ മുങ്ങിയത്. ഇവരിൽ നിന്നും 14 പേരെ ലിബിയൻ തീരദേശ സേന രക്ഷപ്പെടുത്തി. ബോട്ടിൽ എത്ര പേരുണ്ടായിരുന്നു എന്ന് കൃത്യമായി അറിവായിട്ടില്ല. നൂറിലധികം പേർ മുങ്ങിമരിച്ചിട്ടുണ്ടാകാമെന്നാണ് ലിബിയൻ തീരദേശ സേന പറയുന്നത്. ഇറ്റലിയിലേക്കും മറ്റു യൂറോപ്യൻ രാജ്യങ്ങളിലേക്കും അഭയാർഥികൾ പ്രവഹിക്കുന്ന പ്രധാന കടൽമാർഗമാണിത്