‘രണ്ട് രൂപയ്ക്ക് 7 കിലോ അരി, അടിസ്ഥാന വേതനം 18000 രൂപ’; സാധാരണക്കാരെ ലക്ഷ്യംവെച്ച് സിപിഐഎമ്മിന്റെ പ്രകടനപത്രിക

സാധാരണക്കാരേയും തൊഴിലാളികളേയും ലക്ഷ്യംവെച്ച് സിപിഐഎമ്മിന്റെ പ്രകടനപത്രിക. പതിനഞ്ച് വാഗ്ദാനങ്ങളാണ് പ്രകടനപത്രികയില്‍ ഉള്‍പ്പെടുത്തിയിരിക്കുന്നത്. തൊഴിലാളികളുടെ അടിസ്ഥാന വേതനം 18000 രൂപയാക്കും എന്നതാണ് പ്രധാന വാഗ്ദാനം. രണ്ട് രൂപ നിരക്കില്‍ ഒരാള്‍ക്ക് ഏഴ് കിലോ ഭക്ഷ്യ ധാന്യം പ്രതിമാസം നല്‍കുമെന്നും സിപിഐഎം വാഗ്ദാനം നല്‍കുന്നു. സിപിഐഎം ജനറല്‍ സെക്രട്ടറി സീതാറാം യെച്ചൂരിയാണ് പ്രകടനപത്രിക പുറത്തിറക്കിയത്. ബിജെപിയെ തകര്‍ക്കുകയാണ് മുഖ്യ ലക്ഷ്യമെന്നും അദ്ദേഹം വ്യക്തമാക്കി.

സിപിഐഎം അധികാരത്തിലെത്തിയാല്‍ സാര്‍വത്രിക ഭക്ഷ്യവിതരണം നടപ്പിലാക്കുമെന്ന് യെച്ചൂരി പറഞ്ഞു. ഇതിന്റെ ഭാഗമായി ഒരു കുടുംബത്തിന് ഏഴ് കിലോ ഭക്ഷ്യധാന്യം മാസം വിതരണം ചെയ്യും. സൗജന്യ ആരോഗ്യരക്ഷാ അവകാശം നടപ്പിലാക്കും. ജി ഡി പി യുടെ 5 ശതമാനം ആരോഗ്യ രക്ഷക്ക് മാറ്റി വെക്കും. തൊഴില്‍ അവകാശ നിയമം നടപ്പിലാക്കും. വനിതാ സംവരണം 33 ശതമാനമാക്കുമെന്നും സിപിഐഎമ്മിന്റെ പ്രകടന പത്രികയില്‍ പറയുന്നു.

കര്‍ഷകര്‍ക്ക് 50 ശതമാനം ഉയര്‍ന്ന താങ്ങു വില ഉറപ്പാക്കും. വയോ ജനങ്ങളുടെ പെന്‍ഷന്‍ 6000 ആയി ഉയര്‍ത്തും. ട്രാന്‍സ്‌ജെന്‍ഡര്‍ വിഭാഗത്തിന് വിദ്യാഭ്യാസ സ്ഥാപനങ്ങളില്‍ പ്രത്യേക സംവരണം ഏര്‍പ്പെടുത്തുമെന്നും പ്രകടനപത്രികയില്‍ വ്യക്തമാക്കുന്നു.

1. തൊഴിലാളികളുടെ അടിസ്ഥാന വേധനം 18000 രൂപ ആക്കും

2. കര്‍ഷകര്‍ക്ക് 50 ശതമാനം ഉയര്‍ന്ന താങ്ങു വില ഉറപ്പാക്കും

3. സാര്‍വത്രിക ഭക്ഷ്യ വിതരണം. രണ്ട് രൂപ നിരക്കില്‍ ഒരാള്‍ക്ക് 7 കിലോ ഭക്ഷ്യ ധാന്യം പ്രതിമാസം

4. സൗജന്യ ആരോഗ്യ രക്ഷ അവകാശം. ജിഡിപിയുടെ 5 ശതമാനം ആരോഗ്യ രക്ഷക്ക് മാറ്റി വെക്കും

5. വനിതാ സംവരണം 33 ശതമാനം

6. തൊഴില്‍ അവകാശ നിയമം

7. വയോ ജനങ്ങളുടെ പെന്‍ഷന്‍ 6000 ആയി ഉയര്‍ത്തും

8.പ്രതിരോധ, ഊര്‍ജ, റെയില്‍വേ മേഖലകളിലെ സ്വകാര്യവത്കരണം നിര്‍ത്തലാക്കും

9. ട്രാന്‍സ്‌ജെന്‍ഡറുകള്‍ക്ക് വിദ്യാഭ്യാസ സ്ഥാപനങ്ങളില്‍ സംവരണം.

10. ആധാര്‍കാര്‍ഡില്ലാതെ വര്‍ഷം 12 എല്‍പിജി സിലിണ്ടറുകള്‍

11. ആര്‍എസ്എസ് അനുഭാവികളെ രാജ്യത്തിന്റെ തന്ത്ര പ്രധാന സ്ഥാനങ്ങളില്‍ നിയമിച്ച ബിജെപി സര്‍ക്കാര്‍ നടപടി റദാക്കും

12. ടെലികോം മേഖലയുടേയും ഇന്റര്‍നെറ്റ് സേവന മേഖലയുടേയും കുത്തകവല്‍ക്കരണം തടയും.

13. ആനുപാതിക പ്രാതിനിധ്യം ഉറപ്പാക്കും വിധം രാജ്യത്തെ തെരഞ്ഞെടുപ്പ് സംവിധാനം പരിഷ്‌കരിക്കും. ഇലക്ടറല്‍ ബോണ്ടുകള്‍ റദ്ദാക്കും.

14. സ്വകാര്യമേഖലയില്‍ പട്ടിക ജാതി, പട്ടിക വര്‍ഗ്ഗ വിഭാഗങ്ങള്‍ക്ക് തൊഴില്‍ സംവരണം ഉറപ്പാക്കും.

15. ധനികരുടേയും കോര്‍പ്പറേറ്റുകളുടേയും നികുതി ഉയര്‍ത്തും. ഉള്ളവരും ഇല്ലാത്തവരും തമ്മിലുള്ള വിടവ് നികത്തുംവിധം നികുതിസംവിധാനം പുതുക്കിപ്പണിയും.

രാജ്യത്തിന്റെ ചരിത്രത്തില്‍ തന്നെ ഏറ്റവും നിര്‍ണ്ണായകമായ തെരഞ്ഞെടുപ്പ് എന്ന ആമുഖത്തോടെയാണ് സിപിഐഎമ്മിന്റെ പ്രടകനപത്രിക തുടങ്ങുന്നത്. സിപിഐഎം മുന്നോട്ടുവെച്ച തൊഴിലാളി പ്രക്ഷോഭങ്ങള്‍, കര്‍ഷക സമരങ്ങള്‍ ഉള്‍പ്പെടെ പ്രകടന പത്രികയില്‍ ഉള്‍ക്കൊള്ളിച്ചിട്ടുണ്ട്. ലോക ചരിത്രത്തില്‍ ആദ്യമായി പ്രകടന പത്രികയുടെ ശബ്ദരേഖ പുറത്തിറക്കി എന്ന പ്രത്യേകതയും സിപിഐഎം പ്രകടന പത്രികയ്ക്കുണ്ട്. ഭിന്നശേഷിക്കാര്‍ക്കു വേണ്ടിയാണ് ശബ്ദരേഖ പുറത്തിറക്കിയത്.

നിങ്ങൾ അറിയാൻ ആഗ്രഹിക്കുന്ന വാർത്തകൾനിങ്ങളുടെ Facebook Feed ൽ 24 News
Top