24 സർവേ; ആലത്തൂരിൽ അട്ടിമറിയില്ല

ട്വന്റിഫോർ പുറത്തുവിട്ട 24 ലീഡ് സർവേ പ്രകാരം ആലത്തൂർ മണ്ഡലം ഇത്തവണ പിന്തുണക്കുന്നത് എൽഡിഎഫിനെയാണ്. എൽഡിഎഫ് 46%, യുഡിഎഫ് -42%, എൻഡിഎ-6% എന്നിങ്ങനെയാണ് വോട്ട് വിഹിതം.

2009 ലും 2014 ലും നടന്ന രണ്ട് ലോക്‌സഭാ തെരഞ്ഞെടുപ്പുകളിലും ഇടത്തുപക്ഷത്തിനു തന്നെയായിരുന്നു മണ്ഡലത്തിൽ വിജയം. പി കെ ബിജുവിലൂടെയാണ് കഴിഞ്ഞ രണ്ട് തെരഞ്ഞെടുപ്പുകളിലും എൽഡിഎഫ് വിജയം നേടിയത്. ഈ ട്രെൻഡിന്റഎ ചുവടുപിടിച്ച് ഈ വർഷത്തെ ലോക്‌സഭാ തെരഞ്ഞെടുപ്പിലും എൽഡിഎഫിന് തന്നെയാണ് മുൻതൂക്കം. എൽഡിഎഫ് സ്ഥാനാർത്ഥി പികെ ബിജുവിന് 4% ന്റെ ലീഡ്.

പികെ ബിജു ഏറ്റവും അനായാസം ജയിച്ചുകയറാൻ സാധ്യതയുള്ള മണ്ഡലമാണ് ആലത്തൂർ. ഇടതുപക്ഷത്തിന് വലിയ സ്വാധീനം പ്രദേശത്തുണ്ട്. അവിടെ രമ്യാ ഹരിദാസിന്റെ സ്ഥാനാർത്ഥിത്വം പ്രഖ്യാപിക്കപ്പട്ടപ്പോൾ അത്ര ശ്രദ്ധ കൊടുക്കേണ്ട സ്ഥാനാർത്ഥിയാണെന്ന് പലരും കണക്കാക്കിയിരുന്നില്ല. എന്നാൽ രമ്യാ ഹരിദാസ് തെരഞ്ഞെടുപ്പ് പ്രചരണം ആരംഭിച്ച ശേഷമാണ് രമ്യ എന്ന സ്ഥാനാർത്ഥിയെ ശ്രദ്ധിച്ചു തുടങ്ങിയത്. നിരവധി വിവാദങ്ങൾക്കും മണ്ഡലം സാക്ഷ്യം വഹിച്ചിരുന്നു. മികച്ച പ്രകടം രമ്യാ ഹരിദാസിന് കാഴ്ച്ചവെക്കാൻ സാധിച്ചിട്ടുണ്ടെന്ന് തന്നെയാണ് സർവേ ഫലം വിലയിരുത്തുന്നത്. മാത്രമല്ല കഴിഞ്ഞ വർഷത്തെ സ്ഥാനാർത്ഥി ഷീബയിൽ നിന്നും മൂന്ന് ശതമാനത്തോളം വോട്ട് വർധിപ്പിക്കാൻ രമ്യ ഹരിദാസിനായി.

എൻഡിഎ സ്ഥാനാർത്ഥി ടിവി ബാബുവിന് 6% വോട്ട് മാത്രമാണ് ലഭിച്ചിരിക്കുന്നത്. ഒരുപക്ഷേ സംസ്ഥാനത്ത് ഏറ്റവും കുറവ് വോട്ട് വിഹിതം ലഭിച്ച എൻഡിഎ സ്ഥാനാർത്ഥിയാകും ടിവി ബാബു.

Read Also : 24 സർവേ; ആറ്റിങ്ങലിൽ എൽഡിഎഫിന് വ്യക്തമായ മൂൻതൂക്കം

കേരളത്തിലെ 20 ലോക്‌സഭാ മണ്ഡലങ്ങളിലേക്കുള്ള തെരഞ്ഞെടുപ്പിന് മണിക്കൂറുകൾ മാത്രം ശേഷിക്കേ ഏറ്റവും ഒടുവിലത്തെ ട്രെൻഡ് ഒപ്പിയെടുത്താണ് ട്വൻറിഫോർ സർവേഫലം പുറത്തുവിടുന്നത്. 20 ലോക്‌സഭാ മണ്ഡലങ്ങളിലെ 140 അസ്സംബ്ലി മണ്ഡലങ്ങളിലും സർവേ സംഘം എത്തി. 280 പോളിംഗ് ബൂത്തുകളുടെ പരിധിയിൽ നിന്ന് വിവരശേഖരണം നടത്തുകയാണ് ചെയ്തത്.

സിസ്റ്റമാറ്റിക് റാൻഡത്തിന്റെ അടിസ്ഥാനത്തിൽ കണ്ടെത്തിയ 7986 വോട്ടർമാരിൽ നിന്ന് അഭിപ്രായങ്ങളെടുത്തു. ഏപ്രിൽ പതിനഞ്ചു മുതൽ എപ്രിൽ പത്തൊൻപതു തീയതി വരെയായിരുന്നു സർവേ കാലയളവ്. കേരളത്തിലെ ജനസംഖ്യയുടെ സാമൂഹ്യഘടനയ്ക്ക് അനുപാതമായി ശാസ്ത്രീയമായി കണ്ടെത്തിയ സാമ്പിളാണ് സർവേയുടെ കരുത്ത്.