ഛത്തീസ്ഗഢിൽ രണ്ട് മാവോയിസ്റ്റുകൾ കൊല്ലപ്പെട്ടു

ഛത്തീസ്ഗഡിലെ ദന്തേവാഡയിൽ രണ്ട് മാവോയിസ്റ്റുകൾ കൊല്ലപ്പെട്ടു. കൊല്ലപ്പെട്ടവരിൽ ഒരു വനിതാ മാവോയിസ്റ്റും ഉൾപ്പെടുന്നു. ബുധനാഴ്ച പുലർച്ചെ ഗോന്ദേരാസ് ഗ്രാമത്തിലാണ് ഏറ്റുമുട്ടൽ ഉണ്ടായത്.

മാവോയിസ്റ്റ് ആക്രമണത്തെ ചെറുക്കാനായി നിയോഗിച്ചിട്ടുള്ള പ്രത്യേക സംഘം പട്രോളിംഗ് നടത്തുന്നതിനിടെ മാവോയിസ്റ്റുകൾ വെടിവെക്കുകയായിരുന്നുവെന്നാണ് റിപ്പോർട്ട്. പ്രത്യേക സംഘം നടത്തിയ തിരിച്ചടിയിലാണ് മാവോയിസ്റ്റുകൾ കൊല്ലപ്പെട്ടത്. സംഭവ സ്ഥലത്തു നിന്ന് തോക്കുകളും മാവോയിസ്റ്റ് അനുകൂല രേഖകളും കണ്ടെടുത്തതായി പൊലീസ് അറിയിച്ചു.